Архайынц дзы нæ бæстæйы æппæт регионтæ
«Цæмæй райдайы Фыдыбæстæ». Æппæтуæрæсеон паддзахадон телерадиокомпани дарддæр исы курдиæттæ фæсивæдон патриотон телевизион марафон – фестивальмæ. Архайынц дзы нæ бæстæйы æппæт регионтæ. Се хсæн: вокалисттæ, хоры зарæггæнджытæ, адæмон коллективтæ, бинонты æмæ профессионалон ансамбльтæ. Уыдонæй алкæмæн дæр фадат ис сæ куыстытæ редакцимæ, кæнæ Æппæтуæрæсеон паддзахадон телерадиокомпанийы регионалон филиалы сайтмæ æрбарвитынæн.
Бонæй-бонмæ архайджыты нымæц рæзы. Райгуырæн зæхмæ уарзондзинад, æвзонгдзинад æмæ курдиат сты патриотон марафоны сæйраг домæнтæ. Йæ архайджыты кар у 10 азæй 35 азы онг.
Цæстытæ цæхæр калынц, артисты миниуджытæй хæст æмæ, æрмæст сывæллæттæм чи вæййы, ахæм æргом æмæ æнæхиндзинад. 7 аздзыд Абайты Данæ рагæй уарзы зарын, æмæ йæ курдиатыл тынг æууæнды. Зарæджы конкурс кæй райдыдта, уый тыххæй Данæйы хæстæджытæ базыдтой Æппæтуæрæсеон паддзахадон телерадиокомпанийы хабæртты анонстæй. Уынаффæ дæр æвæстиатæй рахастой. Æвзонг вокалисткæ равзæрста се ппæтæн зындгонд æмæ уарзон зарæг «Катюша».
Йæ райгуырæн зæххы тыххæй радзурын у Уæрæсейы алы цæрæгæн дæр. Уый тыххæй хъæуы музыкалон номыр бацæттæ кæнын, фæлæ æнæмæнгæ патриотон темæйимæ баст. Уый фæстæ дæ видео телефонмæ ныффыссын, кæнæ, 5 минутæй фылдæр чи нæ уа, ахæм клип сисын. Видеофайлимæ курдиат хъæуы, уæ экранты кæй уынут, уыцы марафоны электрон адрисмæ арвитын.
Курдиæттæ исыны мгъуыд фæуыдзæн 30-æм апрелы. Адæмы хъæлæс кæныны æмæ жюрийы æвзæрсты хатдзæгтæм гæсгæ, 10 курдиатджындæр зарæггæнæджы рацæудзысты федералон зылды къæпхæнмæ. Зæгъдзыстæм ма уый дæр, æмæ æрмæстдæр дыууæ вокалисты кæнæ ансамблы Цæгат Ирыстоны кад хъахъхъæндзысты федералон финалы.
Патриотон зарæджы егъау форум «Цæмæй райдайы Фыдыбæстæ» фæуыдзæн 12-æм июны, Уæрæсейы Боны. Хуыздæр клиптæ равдисдзысты æппæтуæрæсеон телемарафоны бон. Цæудзæн 12 сахаты дæргъы платформæ Смотрим.ру-йы, стæй Æппæтуæрæсеон телерадиокомпанийы телеканалты æмæ радиоэфирты.
