Уый тыххæй фехъусын кодтой аппаратон æмбырды
Цæстдарæн-уадзæн пункт «Уæллаг Ларс»-ы рог машинæты рад нал ис. Уый тыххæй фехъусын кодтой аппаратон æмбырды. Ныртæккæ ма посты цур ис мин æмæ рдæг уæзласæн машинæйы бæрц. Ивгъуыд къуырийы уæрæсейаг-гуырдзиаг арæнты сæрты ахызтызты 20 мин машинæйæ фылдæр, æмæ 70 мин адæймагмæ хæстæг. Республикæйы хицауады сæрдары хæдивæг Томайты Ирбег зæрдыл æрлæууын кодта, Цæгат Ирыстоны кæй кусы хайон мобилизацийы фарстаты фæдыл комкоммæ лини. Ныридæгæн æм æрбацыди мин дзæнгæрæгæй фылдæр. Консультативон æххуыс райсæн ис 122 номермæ бадзургæйæ. Сергей Меняйло куыд фæнысан кодта, афтæмæй, бæстонæй кæсын хъæуы, мобилизацимæ повесткæ чи райста, ахæм адæмы хыгъдмæ, цæмæй дзы рæдыдтытæ ма уа, уый тыххæй. Æмбырды ма ныхас цыди ковиды уавæрыл дæр. Дзуапдæттæг ведомствæ фехъусын кодта, ивгъуыд къуырийы низы æппæт бæрæггæнæнтæ кæй фæкъаддæр сты, уый. Республикæ хостæй дæр у ифтонг.
