Архайдтой дзы Цæгат Ирыстоны кафты Паддзахадон академион ансамбль «Алан» стæй Цæцæны кафты æмæ зарды Паддзахадон фольклорон ансамбль «Нохчо»
Цæцæны Республикæйы арæзт æрцыд хæлардзинады концерт. Архайдтой дзы Цæгат Ирыстоны кафты Паддзахадон академион ансамбль «Алан» стæй Цæцæны кафты æмæ зарды Паддзахадон фольклорон ансамбль «Нохчо». Дыууæ культурæйы баиу кæнынæй райдыдтой егъау мадзæлттæ. Кафты Галуан «Вайнах»-ы æрæмбырд сты курдиатджын артисттæ, æцæг профессионалтæ. Иумæйаг концерты дыууæ коллективы равдыстой бæрзонд дæсныйад æмæ сæ хуыздæр хореографион номыртæ. Афтæмæй ма иу хатт се ппæты зæрдыл æрлæууын кодтой, дыууæ регионы æфсымæрдзинад. Хæлардзинады концерты фæлгæты ирыстойнаг артисттæн лæвæрд æрцыдысты кадджын хæрзиуджытæ. Афтæ Цæцæны республикæйы сгуыхт артисты ном амæй фæстæмæ хæсдзысты ансамбль «Алан»-ы солисттæ Козаты Игорь, Къалаты Сослан æмæ Гуыцмæзты Алан. Цæцæны республикæйы сæргълæууæджы арфæйы фыстæг лæвæрд æрцыд ирыстойнаг ансамблы аивадон разамонæг Козаты Зелимханæн. Хæлардзинады концерт фæци иумæйаг кафтæй. Знон та дзуапдæттæн концерт арæзт æрцыд Дзæуджыхъæуы.
