филиал вгтрк государственная телерадиовещательная компания “Алания”

Уымæн æмæ нæ республикæйы зымæгон спорты хуызтæ афтæ парахат нæ уыдысты. Фæлæ фæстаг рæстæг къахдзоныгътыл слæууын бирæты бафæндыд. Æмæ егъау цы фæзуат касти, уый ныр уынгæг сси. Ихын фæзæй дарддæр ам фæзынд, зæгъæн ис, æмæ музей дæр. Æрæмбырд дзы ис бирæ лæвæрттæ номдзыд спортсментæй. Зæгъæм, зындгонд хоккеист Илья Ковальчукы спортивон свитер æмæ клюшкæ, Тарасовы уæлæдарæс ЦСКАйы спортсменты къухфыстытимæ, Челябинскы командæ «Трактор»-ы тырыса æмæ æндæр цымыдисаг экспонаттæ. Цæгат Ирыстоны зымæгон спорты хуызты сывæллæтты скъолайæн ма уый у иу дæнцæг, сæ кой кæй айхъуысын кодтой, уымæн. Алцыдæр хорз, фæлæ спортивон бæрзæндтæм чи тырны, уыдонæн хъуамæ уой æмбæлгæ уавæртæ тренировкæтæ кæнынæн. Хъуыддаг афтæ у, æмæ ихын фæзтæ фаг нал сты. Хоккейæ дарддæр сывæллæттæ се ргом аздæхтой къахдзоныгътыл аив бырыны спорты хуызмæ дæр. Æмæ скъолайы разамынды хъуыдымæ гæсгæ хъæуы ног фæзтæ аразын. Уый тыххæй фехъусын кодтой Мæскуыйы дæр, Уæрæсейы хоккейы Федерацийы президент Владислав Третьякæн. Дзæуджыхъæуы ихын галуанмæ курдиæттæ дзæвгар фæфылдæр сты Сочийы Олимпиадæйы фæстæ. Кæд æвзонг спортсментæн ныртæккæ каникултæ ис, уæддæр фæззæджы тренировкæтæ райдайдзысты ногæй. Хоккейы командæ «Митын стай» йæхи цæттæ кæны Уæрæсейы ерыстæм. Уый у фыццаг ахæм стыр турнир. Нæ командæйы тренер Виктор Стародубцев куыд зæгъы, афтæмæй, цæмæй йæ хъомылгæнинæгтæ хорз æнтыстдзинæдтæ равдисой, уый тыххæй сын хъæуы хорз уавæртæ аразын. Цæгат Ирыстон фæнд кæнынц, тагъд арæзт чи цæуы, ахæм ихын галуантæ аразыны федералон программæмæ бахæссын. Уый фарс рахæцыдысты нæ республикæйы фæсивæдон хъуыддæгты, физкультурæ æмæ спорты министрады дæр. Зымæгон спорты хуызтæ махмæ æрыгоныл нымад сты, фæлæ уæддæр цыбыр рæстæгмæ уарзон систы бирæтæн. Уый та у спортивон æнтыстдзинæдтæм фæндаг.