Афтæмæй стыр æвæрæн хæссынц рæзгæ фæлтæры хъомыладмæ
Бахъахъхъæнын ирон æвзаг æмæ культурæ. Цалдæр азы республикæйы хъæппæрисджын къордтæ аразынц авторон мультфильмтæ ирон æвзагыл, æмæ тæлмац кæнынц зындгонд фæсарæйнаг куыстытæ. Афтæмæй стыр æвæрæн хæссынц рæзгæ фæлтæры хъомыладмæ. Сæ куыстимæ базонгæ не сфæлдыстадон къорд, æмæ бæлвырддæр радзурдзæн Хъайтмазты Дзерассæ.
Ирд нывтæ, зæрдылдарæн мелоди, сæйрагдæр та æнцонæмбарæн текст ирон æвзагыл. Мультфильмты тематикæ парахат у. Анимацион роликты сабиты зонгæ кæнынц Ирыстоны культурæ æмæ традицитимæ. Фыццаг сери у зындгонд мультфильм «Синий трактор»-ы аналог. Алы серийы дæр æвдыст цæуынц национ хицæндзинæдтæ æмæ колорит. Проект саразаны хъуыды æрцыд Сæлбиты Аланмæ. Уый у æмдзæвгæты автор æмæ сценарист. Æххуыс ын кæнынц йæ бинонтæ æмæ иузæрдион адæм. Æдæппæтæй сæ фæндты ис мадæлон æвзагыл 30 серийы рауадзын. 17-æй ныридæгæн ис пайда кæнын.
Ирон æвзаг бахъахъхъæныны нысан цы проекттæн ис, уыдон абон уæлдай ахсджиаг сты. 2017-æм азы Цæгат Ирыстоны æрыгон активистты къорд сфæнд кодта хи хъарутæй мадæлон æвзаг парахат кæнын нырыккон фæсарæйнаг кинонывтæ æмæ мультфильмтæ тæлмацгæнгæйæ. Проекты автор у Бутаты Зауыр. Тæлмац кæны йæхæдæг. Зауыр æрмæст мультфильмты мидис нæ хæццæ кæны ирон аивадуарзджытæм, фæлæ ма сæм бахæссы йæхи хъуыдытæ, æхсæнады нырыккон риссаг фарстатæ æргом кæнгæйæ.
Фæсивæд бакуыстой ахæм зындгонд проекттыл, куыд «Дом», «Моана», «Рапунцель», «Зверополис» æмæ «Тайна Коко». Ныртæккæ фæвæййынц куыст мультфильм «Кунг-фу Панда»-йыл. Сæ фæндты ма ис иронау сдзурын кæнын киноныв «Пассажирты» хъайтарты.
Ахæм алыхуызон проекттæ, фæлæ сын ис иумæйаг ахсджиаг хъуыды – баххуыс кæнын ирон æвзаг бахъахъхъæнын. Æмæ сæ алчидæр стыр æвæрæн хæссы ацы хъуыддагмæ.
