филиал вгтрк государственная телерадиовещательная компания “Алания”

Патриотизм æрмæст ныхæстæ не сты, фæлæ бæлвырд хъуыддæгтæ. Цалынмæ æфсæддонтæ фронты сæ хæстон хæстæ æххæст кæнынц, уæдмæ сæ фæсчъылдымы та æххæст кæнынц хъæугæ дзаумæттæй. Мæздæджы аграрон-промышленнон техникумы ацы хъуыддагмæ сæрмагонд æргом здахынц. Ахуырадон æрмадзты цæттæ кæнынц акъоппы цырæгътæ æмæ хи хсæн фæрæзтæ. Æмæ æрмæст уый нæ. Бæлвырддæр радзурдзæн Хъайтмазты Дзерассæ.

Аудиторитæ ахуырты фæстæ ам афтид нæ вæййынц. Мæздæджы аграрон-промышленнон техникумы студенттæ æмæ ахуыргæнджытæ самал кодтой стыр волонтерон цех, цæмæй æххуыс кæной æфсæддонтæн. Куыст йæ тæмæны ис уыцы иу рæстæг цалдæр æрмадзы. Ролан Клименко у 2-æм курсы студент. Волонтерты змæлды ис ахуыры фыццаг бонтæй. Алцыдæр райдыдта фарон ноябры. Уæд техникумы сфæнд кодтой базонгæ уæвын ног технологиимæ, æмæ Ролан уыд, конвейеры раз фыццаг чи рлæууыд, уыдонæй иу. Лæппу куыд зæгъы, афтæмæй йын ахсджиаг у, ацы стыр хъуыддагмæ йе вæрæн бахæссын.

 «Хусгонд æфсæддон душ» хæстон уавæрты хъæугæ фæрæз у. Йæ цæттæ кæныны технологи домы сыгъдæгдзинад æмæ бæлвырддзинад. Пропорциты рæдыд бауадзыны гæнæн нæй. Фæрæз хъуамæ уайтагъд куса цавæрфæнды уавæрты дæр. Хъæуы йыл чысыл дон æркæнын, къухты йæ аууæрдын, æмæ уый фæстæ фæзыны бирæ фынк.

Сыхаг бæстыхайы æндæр температурон фæтк ис, ам тайын кæнынц мыдадз. Техникумы арæзт цæуынц акъоппы цырæгътæ цæттæ кæнынæй дæсныйадæвдисæг ахуыртæ. Студенттæ æмæ ахуыргæнджытæ иумæ ахуыр кæнынц ацы ног æмæ ахсджиаг хъуыддагыл. Ахæм куыст коллектив æнгом кæны, фæсивæды ма ахуыр кæны сæйрагдæр хæзнатыл. Алы цырагъ дæр нысан кæны блиндажы цалдæр сахаты хъарм æмæ рухс кæй уыдзæн, уый.

Æххуыс æрмæст Мæздæджы не *мбырд кæнынц. Техникумы дыккаг хайад ис станицæ Черноярскæйы. Уым дæр æрвылбон фæллой кæнынц хæстонтæн баххуыс кæныны нысанимæ. Ахуыргæнæндоны апарахат цитрусты хæрздæф. Студенттæ æмæ педагогтæ цæттæ кæнынц витаминты æмбырдгондтæ: кæрдынц фæткъуытæ, апельсинтæ, кивитæ æмæ гагадыргътæ. Сæрмагондæй сыл бакусынц, бахус сæ кæнынц дегидраторты,  уый фæстæ сæ сæхгæнынц.

Техникумы æрмæст цай нæ цæттæ кæнынц. Æрмадзы æхсидæны цæхæртæ кæлынц, ам цæттæ кæнынц сæрмагонд пецтæ. Пайда кæнынц зæронд газы баллонтæй. Æрбахæссынц сæ æмхъæуккæгтæ æмæ кусджытæ. Фидæны мастертæ æфсæйнаг гæппæзтæй кæнынц хæстонтæн хъæугæ хъармгæнæнтæ. Техникум æнтыстджын æмгуыстад кæны волонтерты организацитимæ æмæ адæмон фронтимæ.

Акъоппы цырагъ, цай кæнæ пец – уый у хъæугæ æххуыс, сæрмагонд æфсæддон операцийы зонæйы йæ хæстон хæстæ чи æххæст кæны, уыдонæн. Мæздæджы техникум ирдæй равдыста, фæсчъылдымы æххуыс дæр, фронты чи  ис, уыцы лæппутæ куыд фидар сты, ахæм кæй у, уый.