Игорь Шаталов куыд загъта, афтæмæй кæд ацы аз рагагъоммæ фæуазал, уæддæр, коммуналон службæтæ уыдысты цæттæ
Хъармгæнæн сезоны, коронавирусы ныхмæ ахадгæ мадзæлтты, ахуыргæнæндæттæм бацæуæнты уавæрыл æмæ цардархайды æндæр фарстатыл ныхас цыди Дзæуджыхъæуы æхсæнадон советы радон æмбырды. Дзæуджыхъæуы бынæттон администрацийы сæргълæууæджы хæдивæг Игорь Шаталов куыд загъта, афтæмæй кæд ацы аз рагагъоммæ фæуазал, уæддæр, коммуналон службæтæ уыдысты цæттæ, æмæ хæдзæрттæм хъарм радтой афоныл. Системæ скуыста æнæкъуылымпыйæ, гыццыл аиппдзинæдтыл та бакуыстой æвæстиатæй. Æхсæнадон Советы сæрдар разыйæ баззад дзуаппдæттæг куыстуæттæй, фæлæ бабар кодта, цæмæй хынцой цæрджыты хъуыдытæ дæр, байгом кæнын хъæуы комкоммæ линитæ, цæмæй адæм сæ куырдиæттæ æмæ фæндонтимæ дзурой уырдæм. Коронавирусы уавæры тыххæй социалон политикæйы, æнæниздзинады æмæ фæллойадон къамисы сæрдары раныхасмæ байхъусгæйæ, хаст æрцыди уынаффæ, сæрмагонд акцитæ аразын, цæмæй адæмы разæнгард кæной вакцинаци кæнынмæ. Боны фæткы æрныхас кодтой ахуыргæнæндæттæм бацæуæнты тыххæй дæр. Æмбырды архайджытæ хъуамæ 15-æм октябры онг сбæлвырд кæной пандустæ æмæ æндæр хъæугæ фæрæзтæй куыд ифтонггонд сты, уый.
