Йæ автор у Уæрæсейы Федерацийы культурæйы сгуыхт кусæг Æрсойты Владимир
Цхинвалы арæзт æрцыд чиныг «Ирон адæмон хореографийы цæсгæмтты» презентаци. Йæ автор у Уæрæсейы Федерацийы культурæйы сгуыхт кусæг, Цæгат Ирыстоны адæмон артист, зындгонд ирыстойнаг кафæг æмæ хореограф, Паддзахадон ансамбль «Симд»-ы солист Æрсойты Владимир. Чиныг арæзт у 6 хайæ: ансамбльтæ «Симд» æмæ «Алан»-ы кафджыты автобиографитæ æмæ хуызистытæ. Уыимæ канд кафджыты царды хабæрттæ фыст не рцыдысты, фæлæ ма хъуыстгонд хореографты тыххæй мысинæгтæ дæр. Чиныджы бакæсæн ис нывгæнджыты æмæ ансамбльты разамонджыты тыххæй хабæрттæ. Ома, ирон хореографимæ стыр æвæрæн чи бахаста, уыдон. Æрсойты Владимир куыд бафиппайдта, афтæмæй ног æмбырдгондыл кусгæйæ, сæмбæлд зындзинæдтыл. Ансамбль «Симд»-ы архивтæ фесæфтысты зынгсирвæзты рæстæг. Уымæ гæсгæ информаци зын æмбырдгæнæн уыд. «Ирон адæмон хореографийы цæсгæмттæ» – уый у Æрсойты Владимиры дыккаг чиныг. Раздæр уал ныммыхуыр кодта ирон национ кафты тыххæй иртæстытæ.
