Студенттæ систы Уæрæсейы географион æхсæнады фæсивæдон хайады архайджытæ
Цæгат Ирыстоны паддзахадон университеты æрыгон ирстаджытæ лæмбынæг ахуыр кæнынц Кавказы Стыр æфцæджы суадонтæй минералон доны сконд æмæ пайдайаг æууæлтæ. Студенттæ систы Уæрæсейы географион æхсæнады фæсивæдон хайады архайджытæ. Æрыгон специалисттæ фæнд кæнынц аразын экспедицитæ пробæтæ исынæн, доны анализтæ кæнынæн. Алцыдæр, цæмæй скæной минералон суадонты фыццаг электрон атлæс. Университет ныридæгæн балæвæрдта курдиат проектæн грантон æххуыс райсынæн. Бæлвырддæр Хъайтмазты Дзерассæйы æрмæджы.
Кальций, магний, натрий – минералон дон конд у дæсгай æрдзон элементтæй. Цæгат Ирыстоны паддзахадон университеты студенттæ сбæлвырд кодтой: алы хатт иухуызон пайдайаг нæ вæййы, йе *ууæлтæ ивынц сезонмæ, æрдзон уавæртæм æмæ суанг боны рæстæгмæ гæсгæ дæр. Сæрмагондæй уый тыххæй æрыгон иртасджытæ ахуыр кæнынц æрмæст Кавказы Стыр æфцæджы зындгонд суадонтæ нæ, фæлæ ма рабæрæг кæнынц ногтæ дæр, æппæт ивддзинæдтæ нысан кæнынц бынаты.
Алы суадон дæр лæмбынæг иртасынц: специалисттæ анализ кæнынц доны химикон скондæн, минерализацийы æмвæзадæн æмæ йæ ахадындзинадæн организмыл. Ахуыргæндтæ бæрæг кæнынц, минералон дон цавæр уавæрты æмæ кæмæн хæссы пайда, уый.
Ацы проект равзæрд студенттæм – Уæрæсейы географион æхсæнады фæсивæдон центры архайджытæм. Хъæппæрисы куратортæ куыд зæгъынц, афтæмæй наукон ахаст дæтты, кавказаг дæттæм ног цæстæй ракæсыны æмæ сæ гæнæнтæ раргом кæныны фадат. Кæй раиртæстой, уыдоны хсæн Хъæрмæдоны æмæ Хилакы минералон суадæттæ, æмæ цыппар – раздæр бæрæг чи нæ уыд, ахæмтæ. Уыдонæй дыууæйы бæрæггæнæнты базæ снысан кæнынæн, командæ ныридæгæн балæвæрдта курдиат Роспатентмæ.
Разæй – экспедицитæ, пробæтæ исын æмæ лабораторон анализтæ. Ацы хъуыддагмæ фæнд кæнынц, æхсæнады иннæ хайæдтæй специалистты æргом дæр здахын, цæмæй баиу кæной зонындзинæдтæ æмæ куыст бæлвырддæр æххæстгонд цæуа.
Цæгат Ирыстоны паддзахадон университет балæвæрдта курдиат Кавказы Стыр æфцæджы минералон суадонты фыццаг электрон атлæс саразынæн грант райсынæн. Проект æххуыс куы райса, уæд уый суыдзæн стыр æвæрæн Цæгат Кавказы наукæйы райрæзтмæ.
