Æрныхас кодтой дунеон уавæрты нырыккон технологитæй æмæ принциптæй пайда кæныныл
Цæгат Ирыстоны паддзахадон университеты, «Точка кипения» кæй хонынц, уым арæзт æрцыд телеканал «RT» («Russia Today»)-йы генералон директор Никколты Алексейы фембæлд регионалон дзыллон иформацийы фæрæзты разамонджытимæ. Æрныхас кодтой дунеон уавæрты нырыккон технологитæй æмæ принциптæй пайда кæныныл. Стыр æргом аздæхтой аразгæ интеллектмæ. Бæлвырддæр та – дзыллон информацийы фæрæзты архайдыл куыд ахады, уымæ. Телеканалы генералон директор куыд радзырдта, афтæмæй «Раша Тудей»-ы ныртæккæ дæр, информаци агургæйæ, пайда кæнынц нейроны хызтæй. Абон уый нымад у цыбыр хабæрттæ æмбырд кæныны сæйрагдæр фæрæз. Ныхас ма цыд, журналистикæйы цы ивддзинæдтæ цæуы, уыдоныл дæр. Нырыккон технологиты, интернет-медиа æмæ блогерты рæстæг, традицион дзыллон информацион фæрæзтæ уæддæр сты сæйрагдæртыл нымад. Уымæн æмæ аразынц хæрзхъæд æмæ бæлвырд информацион продукт. Регионалон дзыллон информацион фæрæзты разамонджытæн фадат уыд сæ фæрстытæ радтынæн. Фембæлд арæзт æрцыд, «Медиафорум-2024»-ы программæ æххæст кæнгæйæ.
