Иртæстытæ цæуынц, уæлдæр ахуыргæнæндон Никитæйы номыл ботаникон цæхæрадонимæ цы æмгуыстады бадзырд бафыста, уый æххæст кæнгæйæ
Цæгат Ирыстоны паддзахадон университеты архайынц, Кавказы æмæ Хъырымы цы кæрдæджытæ зайынц, уыдонæй хостæ æмæ биологон активон хъацæнтæ аразыныл. Иртæстытæ цæуынц, уæлдæр ахуыргæнæндон Никитæйы номыл ботаникон цæхæрадонимæ цы æмгуыстады бадзырд бафыста, уый æххæст кæнгæйæ. Ног препараттæ хъуамæ æххуыс кæной алыхуызон низтæ дзæбæх кæнынæн. Фыццаг хатдзæгты тыххæй радзурдзæн Хъайтмазты Дзерассæ.
Цæгат Ирыстоны паддзахадон университеты анатомийы, физиологийы æмæ ботаникæйы кафедрæйы аспиранткæ Мæрзойты Дианæ 6 мæйы кусы функционалон нозтытæ скæныныл. Уыдон сты биологон активон уæлæмхасæнтæ, хорзырдæм ахадынц нервыты системæйыл, къаддæр кæнынц катай, æмæ æххуыс кæнынц депрессиимæ тох кæнын. Дианæ иртæстытæ кæны йæ кандидатон куыст æххæстгæнгæйæ. Чызг куыд зæгъы, афтæмæй функционалон нозтытæ республикæйы нæ цæттæ кæнынц, уымæ гæсгæ сыл сфæнд кодта бакусын. Нозты фыццаг хуыз хъавы иннæ аз уалдзæгмæ сцæттæ кæнын.
Ацы аз мартъийы Цæгат Ирыстоны паддзахадон университет æмæ Хъырымы Никитæйы номхæссæг ботаникон цæхæрадон бафыстой ахуырадон æмæ наукон къабæзты æмгуыстад кæныны тыххæй бадзырд. Уымæ гæсгæ республикæмæ Хъырымæй сластой алыхуызон дзæбæхгæнæн зайæгойтæ. Уыдонæй иу – Бессмертник песчаный. Анатомийы, физиологийы æмæ ботаникæйы кафедрæйы наукон кусджытæ æмæ аспиранттæ бавнæлдтой йæ бындурыл хос аразынмæ. Уый баххуыс кæндзæн игæры низтимæ тох кæнын, фæтыхджындæр кæндзæн масты цыд, фæбæрзонддæр кæндзæн масты дзæкъулы тонус. Фыццаг бакуыстытæн ныридæгæн ис бæлвырд бæрæггæнæнтæ. Препарат рагагъоммæ фæлварынц лабораторон уырытыл.
Дзæбæхгæнæн кæрдæджыты пайдайаг æууæлтæ иртасыны куыстмæ раздахынц студентты æргом дæр. Уыдонæн уый хорз фадат у, сæхи равдисынæн æмæ практикон фæлтæрддзинад райсынæн, зæгъы анатомийы, физиологийы æмæ ботаникæйы кафедрæйы сæргълæууæг Гаппуаты Валентинæ. Æмгуыстадмæ гæсгæ ма студенттæн ис, Никитæйы номхæссæг ботаникон цæхæрадоны наукон центры бындурыл сæрдыгон практикæ ацæуыны, аспиранттæн, ахуыргæнджытæн æмæ наукон кусджытæн та сæ квалификаци фæбæрзонддæр кæныны гæнæн.
Æмгуыстадмæ гæсгæ ботаникон цæхæрадоны æмæ паддзахадон университеты специалисттæн уыд иумæйаг экспедицитæ Цæгат Ирыстоны хæхты. Иртасджыты ныхæстæм гæсгæ, уый фæрцы бантысдзæн ног бæрæггæнæнтæ сæмбырд кæнын Кавказы хъæдты алыхуызонады тыххæй.
