Хъазты хуызы сывæллæтты ахуыр кæндзысты ирон культурæйыл, традицитыл æмæ æгъдæуттыл
Цмийы лагерь «Звездочка»-йы байгом лингвистон этнокультурон рад. Хъазты хуызы сывæллæтты ахуыр кæндзысты ирон культурæйыл, традицитыл æмæ æгъдæуттыл. Лæппутæ сахуыр уыдзысты ирон бæгæны фыцын, чызджытæ та – кæлмæрзæнтæ быйын. Ацы рад ацы аз у дыккаг. Фыццаг уыд спортимæ баст. Æртыккаг та уыдзæн – журналистикæйы темæмæ гæсгæ. Бæлвырддæр радзурдзæн Хъайтмазты Дзерассæ.
12-аздзыд Мецъиты Алан сæрдыгон лагерьты йæ фæллад æрвылаз фæуадзы. «Звездочка»-йы фыццаг хатт ис, фæлæ хуымæтæджы нæ. Йæ нысан у фылдæр базонын фыдæлты культурæ æмæ æгъдæутты тыххæй. Ацы рад у – лингвистон æмæ этнокультурон. 3 къуырийы дæргъы алы бон дæр сывæллæттæ ахуыр кæндзысты ирон æвзаг, уыимæ чингуытæм гæсгæ нæ, фæлæ хъæзтыты, зарджыты, адæмон сфæлдыстады фæрцы.
Этнокультурон рады сывæллæттæн æххуыс кæнынц, куыд мадæлон æвзагыл дзурын, афтæ алы дзырды дæр цы арф мидис æвæрд ис, уый бамбарыны хъуыддаджы дæр. Ам скъоладзауты ахуыр кæнынц æрмæст дзургæ нæ, фæлæ литературон æвзагыл дæр. Ахуыргæнджытæ сын амонынц традицитæ æмæ алы æмбисонды æмæ зарæджы цы хъуыды сусæггонд ис, уый.
Сæрмагонд æргом лагеры здахынц æрмдæсныйæдтæм. Алы лæппу дæр афæлвардзæн ирон бæгæны фыцын, чызджытæ та архайдзысты национ кæлмæрзæнтæ быйынæй дæсныйадæвдисæг ахуырты. Сывæллæттæн сараздзысты экскурситæ дæр.
Мадзаларазджытæ куыд зæгъынц, афтæмæй ахæм хуызы рæзгæ фæлтæрæн мадæлон æвзаг ахуыр кæнын æнцондæр æмæ цымыдисагдæр у. Сæрдыгон лагеры директор Тотойты Валерийы ныхæстæм гæсгæ, «Звездочка»-йы рад æрмæст фæллад уадзын нæ нысан кæны. Уый у миддуне хъæздыгдæр кæнæн скъола, ирон æвзаг та – ивгъуыд æмæ фидæн сбæттыны фæрæз.
Лагерь «Звездочка»-йы баулæфын кæй фæнды, уыдон æрвылаз фылдæрæй-фылдæр кæнынц. Ацы аз дзы уыдзæн 8 рады. Алкæцыйыдæр – фæйнæ 35 скъоладзауы.
