Бирæтæн уыцы хайыл сæ машинæтæ фехæлынц, дзыхъхъытæ дзы кæй ис, уымæ гæсгæ
Црауы æмæ Хъарман-Сындзыхъæуы хсæн фæндагыл чи цæуы, уыцы шофыртæ тыхсынц йæ уавæрæй. Бирæтæн уыцы хайыл сæ машинæтæ фехæлынц, дзыхъхъытæ дзы кæй ис, уымæ гæсгæ. Сæ хъаст адæм бахастой адæмон фронтмæ. Æхсæнадон змæлды эксперттæ бынатмæ ацыдысты, æмæ федтой уавæр. Бæлвырддæр хабæрттæ радзурдзæн Хъайтмазты Дзерассæ.
Ацы дзыхъхъытæ машинæтæн тæссаг сты хурбонты дæр, къæвдаты рæстæг та ам, уæвгæ дæр, сæвзæры цъымара. Алагиры æмæ Дыгуры районтæ цы фæндаг иу кæны, уый иунæг ахæм нæу, фæлæ диссаг æндæр хъуыддаг у – Црауы æмæ Хъарман-Сындзыхъæуырдыгæй фæндаджы уæлцъар ног у, астæуæй та, Дыгуры районы территорийыл, æрмæст дзыхъхъытæ. Фарон сцалцæг кодтой 700 метры фæндаджы хай. Фæрæзтæ æрмæст уымæн сфаг ис. 2 районы цæрджытæ ацы уавæрæй тыхсынц. Бирæ шофыртæн сæ машинæтæ хæлд æрцыдысты ам. Æххуысмæ цæрджытæ фæсидтысты «адæмон фронтмæ».
«Адæмон фронты» минæвæрттæ бынатмæ æрбацыдысты æмæ цæрджытимæ ацы фæндаджы хай бафæлвæрдтой. Афтæмæй сбæлвырд кодтой, фарста æнæмæнг лыг кæнын кæй хъæуы. Дыгуры районы администрациимæ лæмбынæг æрныхас кодтой уавæрыл. Рагагъоммæйы бæрæггæнæнтæм гæсгæ, цы мин æмæ 400 метры баззад бацалцæг кæнын, уымæн хъæуы 20 милуан сомы бæрц.
Гæлиты Клим, Адæмон фронты регионалон æххæстгæнæн комитеты разамонæг РЦИ-А: «Адæмон фронты регионалон хайадмæ æрбарвыстой фыстæджытæ, видеоæрмæг. Уыдоны æвдыст цæуы ацы фæндаджы хай, æвзæр уавæры кæй ис, уымæй хъаст кæнынц нæ адæм. Абон æрбацыдстæм, цæмæй йæ нæхæдæг фенæм. Дыгуры районы администрацийæ дæр нæм минæвæрттæ æрбацыд. Йæхæдæг дæр федта уавæр. Загъта, ацы фарстайыл кæй арайынц. Сметæ сарæзтой, балæвæрдтой йæ Хицауадмæ, æнхъæлмæ кæсынц уынаффæмæ. Кæд зæгъой, хъæуы йæ аразын, уæд æй ацы аз сæ бон у, æмæ саразой. Мах та дарддæр кæсдзыстæм, æмæ архайдзыстæм, цæмæй арæзт æрцæуа, куыд тагъддæр, афтæ хуыздæр».
Ацы фæндагæй парахатæй пайда кæнынц – бирæтæ ауылты цæуынц сæ фæллад уадзынмæ Урсдонмæ. Уымæ гæсгæ ма цæрджыты тыхсын кæны, бырæтты контейнертæ кæй нæй, уыцы хъуыддаг. Ацы фарста дæр Адæмон фронт йæхицæн снысан кодта.
