Цæуы Дыгургомы хæхбæсты туристон объекттæм
«Цыкола-Мацутæ-Комы-Арт»-ы фæндагыл байгом кодтой тъунел. Цæуы Дыгургомы хæхбæсты туристон объекттæм. Тъунел эксплуатацийы радтой реконструкцийы фæстæ. Объект байгом кæныны кадджын мадзалы архайдта Хицауады сæрдар Дзанайты Барис. Ног рацарæзт тъунель у 126 м. Куыстытæ дзы цыдысты национ проект «Æдас æмæ хæрзхъæд фæндæгтæ» æххæстгæнгæйæ, æмæ фесты ног национ проект «Царды инфраструктурæ»-мæ гæсгæ. Транспорты æмæ фæндаггон инфраструктурæйы Комитеты сæрдар Солиты Тариэлы ныхæстæм гæсгæ, объект ифтонг у рухсытæй, видеоцæстдарды фæрæзтæй, электрогенератортæй. Цæгат æмæ Хуссар порталы æвæрд æрцыди зынгсирвæзтыты резервуартæ. Тъунел зынгæ фæуæрæхдæр, ныр лæггад кæндзæн уæзласæн машинæтæн æмæ туристон автобустæн дæр. Объектмæ бацæуæн æмæ рацæуæн фидаргонд æрцыдысты уæлæмхасæн фæрæзтæй, тæссаг ын нал у дурæзгъæлдæй. Нырыккон æмæ хæрзхъæд тъунел дзуапп дæтты æппæт нырыккон домæнтæн. Афтæмæй, лыггонд æрцыди Дыгургомы хæхбæстæм ссæуыны къуылымпыдзинад. Раздæр дзы æдас фæндаггон инфраструктурæ кæй нæ уыди, уымæ гæсгæ бирæ туристон базæтæ уыдысты афтид. Ныр туристон маршруттæ фæуæрæхдæр уыдзысты, загъта Дзанайты Барис. Тъунел байгом кæныны хæдфæстæ дзы фыццаг рацыди уæзласæн машинæты колоннæ.
