Цымыдисаг концерт «Ирон джаз фæндыр» арæзт æрцыд Дзæуджыхъæуы. Аивадуарзджытæ байхъуыстой джазы, классикон æмæ национ уацмыстæм. Концертмæ байхъуыста не сфæлдыстадон къорд дæр.
Саксофон, электрогитарæ æмæ ирон фæндыр. Ног музыкалон проект «Ирон джаз фæндыр»-ы баиу сты алыхуызон инструментты зæлтæ. Ахæм цымыдисаг концерт саразын къухы бафтыд Суанты Кимы номыл национ эстрадон оркестримæ. Концерты солисткæ Къæбысты Зæлинæ куыд зæгъы, афтæмæй йемæ кусын у бæрнон хъуыддаг. Сæхи цæттæ кодтой 3 къуырийы.
Къæбысты Зæлинæ, фæндырдзæгъдæг: «Джаз тынг цымыдисаг музыкæ у. Фæндид мæ, цæмæй нæ фæсивæд хъусой хорз музыкæмæ, рæсугъд зæлтæм. Æмæ мæнмæ гæсгæ, джаз ахæм у. Ацы концерты нæ равдисын фæнды, ирон фæндырæй æрмæст адæмон музыкæ ацæгъдæн кæй нæй, уый».
Концертмæ æрбацыд бирæ адæм. Æмæ се ппæты зæрдæмæ кæй фæцыд, уый бæрæг уыд. Уæлдайдæр та ирон фæндырæй ног музыкæ куыд ацæгъдæн ис, уый. Залы 19 æнусы музыкæ куы айхъуыст, уæд азæлыд аивадуарзджыты тыхджын къухæмдзæгъд.
Мæргъиты Зæлинæ: «Ацы концерт мæ зæрдæмæ тынг фæцыди. Æнхъæл дæр нæ уыдтæн, джаз ирон фæндырæй цæгъдгæйæ, афтæ рæсугъд рауайдзæн, уый. Мæ зæрдæмæ тынг фæцыд, куыд мæм кæсы алкæй зæрдæмæ дæр фæцæудзæн».
Астор Пьяццоллайы Либертанго, Ришар Гальянойы «Вальс Марго», Чик Кореяйы «Испани», Æлборты Феликсы æмæ Диамбекты Оледжы уацмыстæ. Ацы зындгонд композицитæ ирон национ инструменттыл ацæгъдын æнцон нæу. Фæлæ фæндырыл алцыдæр сфидаудзæн, зæгъы оркестры аивадон разамонæг Къæбойты Николай.
Хæбæлаты Фатимæ, РЦИ-Аланийы культурæйы æмæ дзыллон коммуникациты министр: «Мæнмæ гæсгæ тынг вазыгджын проект у. Ног концертон программæтæ куы фæзыны, уæд уый хорз у. Уæлдайдæр та мæнæ ахæм: цымыдисаг æмæ рæсугъд. Кæбойты Николай курдиатджын адæймаг кæй у, уый радон хатт федтам, фæлæ ма йæ фæлтæрддзинад кæстæртæн кæй амоны, кæй сæ ахуыр кæны, уый та ноджы хуыздæр у. Мæнæн мæ зæрдæ зæгъы ацы къордæн ног æнтыстдзинæдтæ».
«Ирон джаз фæндыр»-ы проектмæ байхъусынмæ æрбацыдысты куыд классикон æмæ национ уацмыстæн аргъгæнджытæ, афтæ, нырыккон аивад чи уарзы, уыдон дæр. Сæ иумæйаг хъуыдымæ гæсгæ концерт рауад тынг зæрдæмæдзæугæ. Æмæ иу концертæй кæй нæ ахицæн уыдзæн, уый алкæйы дæр уырны.
Зыхъуаты Жаннæ
