Цымыдисаг сфæлдыстадыл хæст у Лескены цæрæг Цъеуты Валентинæ. Бирæ азты сылгоймаг фæкуыста библиотекæты. Ныр цалдæр азы ис пенсийы. Уæгъд рæстæг ын бирæ кæй фæзынд,
Æрмдæсныйы къухты насæй рауайдзæн рæсугъд дурын. Цъеуты Валентинæ уый тыххæй пайда кæны хъæдæрмæгимæ архайыны кусæнгæрзтæй. Пецы раз та хус кæнынц, æндæр мигæнæнтæ цæттæ кæнынæн æрмæджытæ. Валентинæ куыд зæгъы, афтæмæй ацы куыст зын нæу. Хъæуы æрмæстдæр рæстæг æмæ сфæлдыстадон цæстæнгас алыхуызон дзауматæй.
Цъеуты Валентинæ: «Зын нæу. Куы зонай цы дæ хъæуы, уый, уæд æнцон кусын у. Куы фæкусын, уæд мæ фæллад цыма фæуадзын. Архайын, æмæ дзы цыдæртæ уайы. Æрбацæуынц сыхы устытæ… сæ зæрдæмæ цæуы».
Цай цымæн мигæнæнтæ, дыргътæн вазæ, æмæ ма суанг цырагъдарæнæн абажур. Ацы дзауматы бындуры нас кæй ис, уый дисы æфтауы. Лагенарийæ, кæнæ ма йæ куыд хонынц куысыфтæгæй, пайда кæнынц Африкæйы, Хуссар æмæ Астæуккаг Азийы, латинаг Америкæйы мигæнæнтæ кæнæ музыкалон инструменттæ аразынæн. Цъеуты Валентинæмæ ацы хъуыддагмæ цымыдисдзинад фæзынд 2 азы размæ.
Цымыдисаг сфæлдыстадмæ Цъеуты Валентинæйы сразæнгард кодта йæ фырты лæвар – Хуссар-Скæсæн Азийæ ласт сувенир. Æрмдæсныйы бафæндыд йæхи ахæм дзаума скæнын куысыфтæгæй. Эксперимент фæрæстмæ. Рауадис дзы мæнæ ахæм шкатулкæ.
Йæ куыстытæ Валентинæ саив кæны алыхуызон æрмæджытæй. Зæгъæм, æнгузы цъарæй скодта хъæндил.
Фыццаг, æмæ нырма уал иунæг хатт, Валентинæ йе сфæлдыстад адæмы размæ рахаста ирон бæгæныйы фестивалы районы къæпхæны. Уæд йæ куыстытæ се ппæт уазджыты дæр дисы бафтыдтой. Стыр аргъ сын скодта культурæйы æмæ дзыллон коммуникациты министр Хæбæлаты Фатимæ дæр.
Хæбæлаты Фатимæ, РЦИ-Аланийы культурæйы æмæ дзыллон коммуникациты министр: «Мæ зæрды ис, сæрмагонд равдыст ын скæндзыстæм. Нæ цæст æм фæдардзыстæм. Кæд ма йæм иннæ районтæй дæр исчи æрбацæуид, æмæ сахуыр кæнид. Тынг рæсугъд аивад».
Фидæнмæ æрмдæснымæ ис рæсугъд фæндтæ. Зæгъæм, йæ хæдзары хъавы рагон ирон мигæнæнты музей байгом кæнын. Уым адæмæн сæ бон уыдзæн сылгоймаджы сфæлдыстадимæ базонгæ уæвын.
Хъайтмазты Дзерассæ
