Мадзал саразыныл бацархайдта фонд «Быть добру»
Туг дæттыны республикон станцæйы арæзт æрцыд туг дæттыны æмæ стæджы магъзы иугонд донорон акци. Мадзал саразыныл бацархайдта фонд «Быть добру». Ахæм акцитæ 13-æм аз кæны. Æдзух дæр дзы бирæ адæм фæархайы. Станцæйы специалисттæ зæрдыл лæууын кæнынц, æрбацæуын ис æрмæст акцийы рæстæг нæ, фæлæ иннæ кусгæ бонты дæр. Сæйрагдæр у, цæмæй донор уа æнæниз. Бæстондæр радзурдзæн Хъайтмазты Дзерассæ.
Æбиты Валерийæн донор уæвын ног хъуыддаг нæу. Ныр 10 азæй фылдæр радты туг. Уый йын сси традици. Абон ацы хъуыддагмæ æмхиц кæны йæ студентты дæр. Цæгат Ирыстоны базарадон-экономикон колледжæй фæсивæд архайынц хæрзаудæн фонд «Быть добру»-йы æмæ туг дæттыны службæйы æппæт иумæйаг акциты.
Чысыл, фæлæ ахсджиаг хъуыддаг æххæст кæны Камилла Хафизова дæр. Цæгат Ирыстоны медицинон колледжы 4-æм курсы студенткæ фидæны уыдзæн медицинон хо. Уый дæр станцæйы фыццаг хатт нæй. Фæлæ ныр сфæнд кодта æрмæст туджы донор нæ, фæлæ ма стæджы магъзы фидæны донор дæр суæвын.
Ахæм гæнæн кæй фæнды, уыдонæн ныр 10-æм аз дæтты хæрзаудæн фонд «Быть добру». Туг дæттыны республикон службæйы специалисттимæ иумæ фонды активисттæ афæдзмæ саразынц цалдæр акцийы. Ацы куысты фæрцы Цæгат Ирыстоны ныридæгæн ис стæджы магъзы 3 мин фидæны доноры. Се ппæт дæр сты æппæтуæрæсеон регистры.
Æмтгæй райсгæйæ, фонд донорОн акцитæ æххæст кæны 13 азы онг. Активонæй дзы архайынц алыхуызон ахуыргæнæндæтты студенттæ. Специалисттæ куыд зæгъынц, афтæмæй алы волонтер дæр стыр æвæрæн хæссы, æмæ йæ бон у кæйдæр цард аирвæзын кæнын. Алы 450 миллилитры дæр – уыйбæрц туг дæттынц донортæ – сты асхджиаг компонентты æвæрæн. Æрвитынц сæ республикæйы медицинон кусæнуаттæм.
Туджы банк баххæст кæнын ис æрмæст акцийы рæстæг нæ. Службæйы дуæрттæ гом сты æндæр бонты дæр. Донор уæвын ис алы 2 мæйы. Нæлгоймæгтæ туг афæдз фæдæттынц 5 хатты, сылгоймæгтæ – 4 хатты. Уый фæстæ æнæмæнг 3 мæйы хъæуы фæлæууын. Фæлæ ахсджиаг хъуыддаг æххæст кæнынц туг иу хатт чи дæтты, уыдон дæр. Уымæн æмæ уый æнæмæнг кæмæндæр баххуыс уыдзæн.
