Экспозицийы фенæн ис нывгæнæджы 50 куысты
Тугъанты Махарбеджы номыл аивадон музейы байгом Павел Зароны куыстыты равдыст «Зароны Сезонтæ. Фенын. Фехъусын. Банкъарын». Экспозицийы фенæн ис нывгæнæджы 50 куысты. Уыдонæй 9, авторы чызг – дзуæртты нывтæ фыссæг Ирина Зарон, балæвар кодта музейæн. Уæвгæ, Павелы куыстытæ зынгæ бынат ахсынц Ирыстоны ивгъуыд æнусы аивады. Павел Зарон райгуырд Киевы. 30-æм азты æрцыд репрессигонд. Куы суæгъд ис, уæд æрцарди Дзæуджыхъæуы. Хæдахуыр нывгæнæг уæвгæйæ, схызт нывкæнынады аивады бæрзæндтæм. Зарон у 100 куыстæй фылдæры автор. Сахуыр, рухс æмæ хуызтæ ирдæй æвдисыныл. Æмæ афтæмæй фæндаг ссардта аивадуарзджыты зæрдæтæм. Зæгъын ма хъæуы уый, æмæ ма равдысты алы куыстмæ хаст æрцыд парфюм, цæмæй, QR-кодæй спайдан кæнгæйæ, алы адæймаг дæр банкъара нывы хæрздæф. Уæдæ дзы ис нозт дæр – нывы рæсугъддзинады ад банкъарынæн. Равдыст байгом кæныны архайдтой Цæгат Ирыстоны алы музейты минæвæрттæ, стæй Уæрæсейы театралон аивады паддзахадон институты ректор. Равдыст фенæн уыдзæн 30-æм ноябрьмæ.
