Къупец Богдан Огановы раздæры хæдзар у, абарæн кæмæн нæй, ахæм архитектурон цыртдзæвæн
Тугъанты Махарбеджы номыл аивадон музейы зымæгон цæхæрадон ногæй гом æрцыд аивадуарзджытæн. Къупец Богдан Огановы раздæры хæдзар у, абарæн кæмæн нæй, ахæм архитектурон цыртдзæвæн. Уым сæ фыццагон хуызы хъахъхъæд æрцыдысты цымыдисаг интерьертæ, алыхуызон историон стильтимæ. Дзæуджыхъæуккаг нывгæнæг Генрих Клузачек хæдзар аив кодта мидæгæй, æмæ йын бантыст аивады алы хуызтæ баиу кæнын. Залтæй иу у – мавритайнаг стилы зымæгон цæхæрадон. Адæмæн у уæлдай уарзондæр. Ис дзы, зынаргъ дуртæй аивгонд фонтан, рагон радиатортæ. Зындгонд фонтан реставраци скодтой дыууæ азы размæ. Ныртæккæ та специалисттæ сног кодтой галерейæ, бæстыхайы æддаг бакаст мидæггаг кæрты, рудзгуытæ, радиаторон хызтæ, фæрсаг тæрхæджытæ. Уæвгæ музейы бæстыхай у нæ горæты фидауц, æмæ архитектурæйы цыртдзæвæн. 1995-æм азæй фæстæмæ нымад æрцыд, федералон нысаниуæг кæмæн ис, ахæм историон æмæ культурон объектыл.
