Нывгæнджытæ иууылдæр сты Кæсæг-Балхъарæй
Тугъанты Махарбеджы номыл аивадон музейы залты байгом аивадон модельер, традицион черкессаг уæлæдарæс иртасæг Мадина Саральпы экспозици «В реке времени», æмæ Сияра æмæ Имара Аккизовты нывкæнынады æмæ графикæйы иумæйаг равдыст. Нывгæнджытæ иууылдæр сты Кæсæг-Балхъарæй. Мадина Саральпы экспозицийы æвдыст цæуынц черкессаг стилы сылгоймаджы уæлæдарæс, ирдæй дзы зынынц сæ хицæндзинæдтæ æмæ æууæлтæ. Костюмтимæ ма равæрдтой сæ хуызистыты сюжеттæ дæр. Автор афтæмæй этникон уæлæдарæсмæ йæ цæстæнгас æвдисы нырыккон дунейы. Сияра æмæ Имара Аккизовты куыстытæ та хаст æрцыдысты Европæйы, Хæстæг æмæ Дард фæсарæнты нывкæнынады аивады национ фондтæм. Дзæуджыхъæуккаг аивадуарзджытæ Имара Аккизовайы зонынц куклатæ аразæгæй. Аивæдты музейы йын йе сфæлдыстад равдисдзысты æндæр хуызæнæй. Куыстытæ иууылдæр сты цымыдисаг, ирд ахорæнтæ æмæ мидхъуыдытимæ. Нывгæнджытæ архайынц нырыккон адæймаг æппæт дунейы бастдзинад равдисыныл.