Хаст æм æрцыдысты, куыд нывгæнæгæн йæхи куыстытæ, афтæ йæ ахуыргæнæг Виктор Орешкин, æмæ йæ фырт Калманты Аланы нывтæ дæр
Тугъанты Махарбеджы номыл музейы залты байгом Цæгат Ирыстоны сгуыхт нывгæнæг, Хетæгкаты Къостайы премийы лауреат, Фыдыбæстæйы Стыр хæсты архайæг Калманты Батыры райгуырды 100 азы боны кадæн равдыст. Хаст æм æрцыдысты, куыд нывгæнæгæн йæхи куыстытæ, афтæ йæ ахуыргæнæг Виктор Орешкин, æмæ йæ фырт Калманты Аланы нывтæ дæр. Ирд нывгæнджыты æмæ академикты къухæй рацыди бирæ зындгонд куыстытæ, абон сты музейты æмæ хи коллекциты. Дæсны колорист, сюжетон композициты мастер, сфæлдыстадон æгъдауæй размæдзыд нывгæнæг. Калманты Батыры нывты ирдæй зынынц райгуырæн зæххмæ, адæммæ æмæ цардмæ æгæрон уарзондзинад. Ленинграды Репины номыл нывкæнынады, скульптурæйы æмæ архитектурæйы институты рауагъдон. Нывгæнæг йæ дипломон куысты адæмы размæ рахаста цымыдисаг ныв «Одевание невесты». Афтæ рауад, æмæ Батыр уыд фыццаг адæймаг, ацы рагон æгъдау чи сныв кодта. Мастер иу хуызæн æнтыстджынæй куыста тематикон, портретты æмæ пейзажты къабæзты. Ирон культурæ нывгæнæджы ахорæнты фæрцы зыны уæлдай ирддæрæй. Абон ын йæ куыстытæ фенæн ис Тугъанты Махарбеджы музейы фондты. Сæ фыды хъуыддаг дарддæр хæццæ кæнынц йæ кæстæртæ – зындгонд нывгæнджытæ Калманты Алан æмæ Мæдинæ.
