филиал вгтрк государственная телерадиовещательная компания “Алания”

Тугъанты Махарбеджы номыл музейы байгом Цæгат Ирыстоны адæмон нывгæнæг Сабанты Хаджумары куыстыты равдыст. «Йе сфæлдыстады арф хъуыды абарæн ис хæхты бæрзондзинадимæ», зæгъынц критиктæ.

Адæмон фольклор, зарджыты истори, Нарты кадджытæй ист сюжеттæ фенæн ис йæ нывты. Хаджумар аив фæлгонцтæ аразы хъæдæрмæгæй дæр. Йæ куыстытæ æвæрд сты хи коллекциты, стæй Национ æмæ Тугъанты Махарбеджы музейты фонды.

Йе сфæлдыстадон фæндаг райдыдта, 40 азы йыл куы сæххæст уæд. Ныртæккæ Сабаны-фыртыл цæуы 85 азы, цæргæбонты куыста зырнæйзилæгæй æмæ хъæдыкуыстгæнæгæй. Сабанты Хаджумар нымад у Ирыстоны музыкалон эпосы бынтæ æмæ хæзнатæ хъахъхъæнджытæй иуыл. Дыууæ мины дыккæгæм азы та сси Паддзахадон филармонийы нæлгоймæгты национ хоры солист.

Сабанты Тамерлан, режиссер, УФ-йы сгуыхт артист: «Адæймаг хъуамæ зарæг йæ зæрдæйы арфæй сиса æмæ уыцы арфæй уыцы зарджытæ куы сисы, уæд зæрдæйыл уый тыххæй æмбæлынц. Стæй йæ ныфтæ дæр сты дингæсæн куыд у, афтæ æвдисынц йæ уды конд, йæ миддуне, кæцы махæн нæ зæрдæмæ цæуы. Бирæ азты ма нын дзæбæхæй фæцæрæт».