Уникалон экспозицийы кæронбæттæн боны йæ саразджытæ аивадуарзджытæн бацæттæ кодтой ирд программæ «Магия голубого цветка»
Тугъанты Махарбеджы номыл музейы кæронмæ æрхæццæ, императоры номыл фарфоры заводы нывгæнæг Татьянæ Чапургинайы куыстыты равдыст «Невозможное возможно». Татьянæ райгуырд Дзæуджыхъæуы, æмæ зæрдæйæ уарзы йæ райгуырæн горæт. Уникалон экспозицийы кæронбæттæн боны йæ саразджытæ аивадуарзджытæн бацæттæ кодтой ирд программæ «Магия голубого цветка». Архайдтой дзы Мариинаг театры цæгатирыстойнаг филиалы, оперæ æмæ балеты театры солисттæ. Хуымæтæг сæргонд не рхъуыды кодтой. 20-æм æнусы райдиан нæ бæстæйы фæзынд символистты аивадон иугонд «Æрвхуыз уарди». Йæ уæнгтæ уыдысты нывгæнджытæ æмæ скульптортæ. Уыдон архайдтой цымыдисаг уацмыстæ аразыныл, фæлмæн ахорæнтимæ æмæ композицитимæ. Равдыст «Магия голубого цветка» фæци дефилейæ. Аивадуарзджытæ федтой фарфорæй конд къабаты æмæ аивгæнæты коллекци. Сæ автор у Татьяна Чапургина.
