Æхсæнады парахат кæны хъуыды, зæгъгæ Дæргъæвсы некрополь туристтæн хъæуы сæхгæнын
Ацы чызг æмæ ма уый хуызæттæ нæ зонынц æвæццæгæн, æруадзæн кæмæн нæй, ахæм цаутæм цы хауы, уый. Социалон хызтæй ист къам ма иу хатт æвдисæн у, хицæн адæмæн, Дæргъæвсы некрополы нысаниуæг, хъыгагæн, кæй ницæуыл дзурæг у, уый. Зын бамбарæн у, ахæм адæмæн сæ сæры цы хъуыдытæ ис, уый. Чъизи кæнынц историон æвдисæндартæ. Ацы цауы фæстæ та ногæй сæвзæрд фарста, Дæргъæвсы некрополь туристон маршруты бынатыл ныууадзæн ис, æви нæ.
97 дзæппазы раздæры хуыз фенæн ис Национ музейы. Арæзтæдты мидæгæй куыд конд уыдысты, уый, кæй зæгъын æй хъæуы, нал зыны. Фыццаг дзæппæзтæ Дæргъæвсы фæзындысты 14-æм æнусы, фæстагмæ та дзы ныгæд æрцыди 18-æмы. Бынæттон цæрджытæ куыд зæгъынц, афтæмæй ма æрæджыйы онг дæр дзæппазтæ мидæгæй хорз хъахъхъæд æрцыдысты, фæлæ фæстаг рæстæг сæ хуыз сафынц. Туристтæн Дæргъæвс у, рæсугъд къамтæ кæм ис сисæн, ахæм бынат. Полинæ æмæ Аленæ Мæскуыйæ ссыдысты экскурсион къордимæ. Гид сын ацы бынæтты тыххæй радзырдта, æви нæ, уый тыххæй фехъусын кодтой разæнгардæй.
Фæлæ хицæн бынæтты адæймаджы хи дарыны æмæ уæлæдарæсы фæткы тыххæй информаци хъыгагæн нæ райстой. Уый у республикæйы уазджытæн гид чи вæййы, уыцы адæмы бæрнондзинад.
Национ музейы филиалы Дæргъæвсы кусы 2 адæймаджы, уый хъахъхъæнæг æмæ кассир. Территорийы вæрд æрцыди камерæтæ, цæмæй уавæрмæ цæстдард цæуа, уый тыххæй. Фæлæ уый фаг нæу. Ахæм бынаты хъуамæ фæтк уа карз, æмæ йæ иууылдæр æххæст кæной æнæмæнг. Уый бынæттон цæрæг уа, æви уазæг, уæлдай нæу.
1972-æм азы уагæвæрдмæ гæсгæ, Дæргъæвсы некрополь сси Республикæйы Национ музейы филиал. Фæлæ, Цогойты Батрадз куыд зæгъы, афтæмæй музейæн æппæт æмбæлгæ документтæ лæвæрд не рцыдысты. Зæгъæм, некрополь цы фæзуатыл ис, уый у Горæтгæрон районы зæхх. Хæхбæсты къуыбырыл дурæй конд ингæнтæ æдзæмæй лæууынц 7 æнусы. Цымыдисаг хуызистытæ кæныны модæ та тæссаг у историон-архитектурон цыртдзæвæнæн.
