Къамтæисæн къæппæджыты фæрцы раиртæстой 12 зубры æмæ иу род
Æртæ азы размæ Цæгат Ирыстоны Турмоны фæдзæхст бынаты кæй рауагътой, уыцы хъæддаг галтæ æрбынæттон сты, æмæ радтой ног фæлтæр. Къамтæисæн къæппæджыты фæрцы раиртæстой 12 зубры æмæ иу род. Уый тыххæй фехъусын кодтой республикæйы экологийы æмæ æрдзон æвæрæнты министрады пресс-службæйæ. Специалисттæ зæгъынц, хъæддаг цæрæгойтæ ног фæлтæр кæй радтой, уый дзурæг у ууыл, æмæ сын ног территори кæй фæбæззыди æмæ сæхи хорз кæй æнкъарынц. Сты хæрзхаст æмæ активон. Зубрты фæдтæ-иу рæстæгæй-рæстæгмæ разындысты, фæлæ фæлтæр дæттынц æви нæ, уый зын зæгъæн уыди. Ныр та уымæн ис дæнцæг. Видеоæрмæджы зыны, хъæддаг галтæ куыд рацу-бацу кæнынц, уый. Уæрæсейы хъæддаг æрдзы Фонд архайы зубрты мыггаг рапарахат кæныныл Урухы æмæ Æрыдоны цæугæдæтты хсæн территорийы. Уыцы хъуыддагæн æххуыс кæны республикæйы хицауад дæр. Фарон Турмоны фæдзæхст бынаты ауагътой 8 хъæддаг галы. Ныртæккæ та ныхас цæуы ног парти баласыныл Ныгуылæн Европæйы фæдзæхст бынæттæй.
