Кадджын мадзалæн æвдисæн уыд не сфæлдыстадон къорд дæр
Зæрдиаг куыстæн æнæ бафиппайæн нæй. Цæгат Ирыстоны хицауады сæрдар Тускъаты Таймураз арфæйы гæххæттытæ радта Æрæфы районы хуыйæн фабрикæйы 6 кусæгæн. Кадджын мадзалæн æвдисæн уыд не сфæлдыстадон къорд дæр.
Гокъоты Оксанæйæн йæ дæсныйад хæссы удæнцойдзинад. Æрæфы районы хуыйæн фабрикæйы кусы 20 азы. Куыд зæгъы, афтæмæй фæстæг мæйты цы куыст кодтой, уый ахадындзинад æмбæрстой æмæ йыл архайдтой зæрдиагæй. Ныр ын æхцондзинад æрхаста æнæнхъæлæджы лæвар.
Цæгат Ирыстоны хицауады номæй Тускъаты Таймураз арфæйы гæххæттытæ радта хуыйæн фабрикæйы æхсæз кусæгæн. Се *хсæн, ссæдз азæй фылдæр чи кусы, ахæмтæ. Хорзæхгонд чи æрцыд, уыдон стыр æвæрæн бахастой республикæйы короновирусы инфекци не руадзыны профилактикæйы ныхмæ сæрмагонд куыстмæ. Тускъайы-фырт загъта, фабрикæйы кусджытæ стыр куыст кæй бакодтой медицинон куыстуæттæ хи бахъахъхъæнæн уæлæдæрасæй æххæст кæныныл. Хицауады сæрдар ма фæбæрæг кодта, Æрæфы районы хуыйæн фабрикæйы сæргълæууæг Таухъазагъты Ирбег, æнæ фæстæмæ фæкæсгæйæ, кæй сразы ацы куыст кæныны фæндонимæ. Æппæт коллективæй дæр агуырдтой, дохтыртæн æнцондæр архайæн кæм уа, ахæм уæлæдарæс бахуыйыныл. Пандемийы рæстæг сæ уыцы граждайнаг миниуæгæн æмæ зæрдиаг куыстæн, конд æрцыд бæрзонд аргъ.
Фембæлды ма архайдтой Æрæфы районы сæргълæууæг Хидирты Батраз æмæ администрацийы сæргълæууæг Лагкуыты Омар. Уыдон дæр арфæйы ныхæстæ загътой, канд хорзæхгод чи æрцыд, уыдонæн нæ, фæлæ æппæт коллективæн дæр.
Æрæфы районы хуыйæн фабрикæйы коллективы куысты хæрзхъæддзинадæн та радон хатт аргъгонд æрцыд. Сæ хуыйджыты фæлтæрддзинады æмæ бæрзонд профессионалон миниуджыты фæрцы сæ хуыд дзаумæттæ зындгонд сты æппæт Уæрæсейы дæр.