Стыр æргом аздæхта æнæниздзинадхъахъхъæнынады æмæ ахуырады бæстыхæйттæм
Радон инспекцион балц республикæйы районтæм. Тускъаты Таймураз бабæрæг кодта, социалон нысаниуг кæмæн ис, уыцы арæзтадон объекттæ. Стыр æргом аздæхта æнæниздзинадхъахъхъæнынады æмæ ахуырады бæстыхæйттæм. Федта, арæзтады æмæ цалцæггæнæн куыстытæ куыд цæуынц, уый. Бæлвырддæр хабæрттæ радзурдзæн Джыбызты Зæринæ.
Сечеры хицауады сæрдары хæстæ æххæстгæнæг федта бирæвæрсыг ирхæфсæн фæз. Подрядчикæн бабар кодта, территори сæхгæнын. Хорзыл банымадта футболон фæзы хæрзхъæддзинад.
Лескены кæронмæ фæхæццæ кæны скъолайы бындурон цалцæг. Æххæстæй дзы баивтой бæстыхайы сæр, сæвæрдтой рудзгуытæ æмæ дуæрттæ. Ныртæккæ ма дзы цæуынц мидæггаг куыстытæ. Проекты аргъ у æртын авд милуан сомы. Объект эксплуатацийы ратдзысты ахуыры азы райдианмæ. Фыццæгæм сентябры хъуамæ кæронмæ фæуа Цыколайы æртыккæгæм скъолайы спортивон залы бындурон цалцæг. Залæй дарддæр сног кæндзысты дзаумæттæ ивæн уæттæ æмæ физкультурæйы ахуыргæнджыты кабинет. Куыстыты иумæйаг аргъ у 2 милуаны æмæ авд сæдæ нæуæдз мин сомы. Тускъаты Таймуразы хъуыдымæ гæсгæ ахæм объекттæ домынц уæлдай цæстдард.
Уымæй дарддæр ма Цыколайы цалцæггæнæн куыстытæ цæуынц Æрæфы районы центрон рынчындоны. Куыстытæм бавнæлдтой майы. Мацутæйы та премьер федта фельдшерон-акушерон пункты арæзтад. Райдыдта апрелы, эксплуатацийы та йæ раттынмæ хъавынц æмгъуыдæй раздæр, сентябры кæрон.
Афæдзы кæронмæ та хъуамæ фæуа Дыгуры районы центрон рынчындоны сывæллæтты поликлиникон хайады комплексон бындурон цалцæг. Тускъаты Таймуразæн равдыстой куыстыты радон къæпхæн. Уæвгæ та архайын райдыдтой апрелы.
Хъарман-Сындзыхъæуы аразынц сывæллæтты рæвдауæндон сæдæ дыууын бынатæн. Ныртæккæ йæ амайынц агуыридурæй. Хъуамæ йæ фæуой афæдзы кæронмæ. Хицауады сæрдарæн загътой, æмгъуыдæй фæстæдæр кæй архайынц, уый. Фæлæ подрядчик йæ куыст фæрæвдздæр кодта.
Сæдæ дыууын бынаты уыдзæн Джызæлы ног рæвдауæндоны дæр. Ам куыстытæ райдыдтой цалдæр мæйы раздæр. Скъолайы агъоммæйы объектты арæзтадмæ цæуы уæлдай бæстон цæстдард.
Социалон объекттæ арæзт цæуынц, национ проекттæ æмæ регионалон программæтæ æххæст кæнгæйæ. Сæ сæйраг нысан у хъæуты æмæ районты æмтгæй райсгæйæ царды хæрзхъæддзинад фæхуыздæр кæнын. Уый та аразгæ у бæрнон структурæты æмархайдæй. Уыцы хъуыды мониторинджы рæстæг фехъусын кодта Тускъаты Таймураз.
Æрвылкъуырион цæстдард сси хорз традици. Хицауады Сæрдары хæстæ æххæстгæнæг подрядон организацитæн фæллад уадзынæн бар нæ дæтты. Сæйрагдæр у фарстатæ бынаты лыг кæнын, æмæ ахæм куыст цæудзæн дарддæр дæр.
