Премьеры хъуыдымæ гæсгæ, хицæн проекттæм гæсгæ, нæ республикæ, иннæ регионтимæ абаргæйæ, ис фæстæдæр
Тускъаты Таймураз хицауады уæнгтимæ стæй районты сæргълæуджытимæ сарæзта æмбырд, æмæ æрдзыртой, национ проекттæ куыд æххæстгонд цæуынц, ууыл. Премьеры хъуыдымæ гæсгæ, хицæн проекттæм гæсгæ, нæ республикæ, иннæ регионтимæ абаргæйæ, ис фæстæдæр. Чысыл раздæр ацы фарстайы фæдыл йæ хъуыдытæ загъта Сергей Меняйло, æмæ бадомдта цыбыр æмгъуыдмæ уавæр сраст кæнын. Зæгъæм, æнæниздзинадхъахъхъæнынады министрад йæ цæст дары национ проект «Æнæниздзинадхъахъæнынад» æххæст кæнынмæ. Фæлæ ис зындзинæдтæ, æмæ уыдоны тыххæй бæстон радзырдта министры хæдивæг Томайты Тамарæ. Сæрмагонд программæмæ гæсгæ Цæгат Ирыстон хъуамæ самал кæна 10 цæугæ медицинон комплексы. Уыдонæй уал дыууæ райстой Рахизфарсы æмæ Мæздæджы районтæ. Контрактмæ гæсгæ ма хæстæгдæр рæстæг райсдзысты ноджыдæр 4 комплексы. Мæздæджы ма хъуамæ ифтонггонд æрцæуа тугдадзинтæ дзæбæхгæнæн регионалон центр. Райсдзысты компьютерон томограф дæр. Стыр æргом аздæхтой санитарон авиацийæ пайда кæныны ахадындзинадмæ. Уæ зæрдыл уын æрлæууын кæндзыстæм, ацы аз Цæгат Ирыстоны æххæст кæнынц, национ проекттæм чи хауы, ахæм 43 регионалон проекты. Сæ иумæйаг аргъ у 7 миллиарды æмæ 400 милуан сомы.
