Уым æркастысты Хъæбæлоты Билары номыл паддзахадон стипенди райсыны кандидатурæтæм
Хицауады сæрдар Тускъаты Таймуразы разамындæй уыд экспертон къамисы æмбырд. Уым æркастысты Хъæбæлоты Билары номыл паддзахадон стипенди райсыны кандидатурæтæм. Сæ курдиæттæ балвæрдтой 24 студенты уæлдæр ахуыргæнæндæттæй æмæ ма 11 адæймаджы астæуккаг профессионалон училищæтæй æмæ техникумтæй. Алкæцыдæр сæ равдыста хорз æнтыстдзинæдтæ ахуыры. Уымæй дарддæр кæнынц наукон-иртасæн куыст, архайынц сфæлдыстадон æмæ æхсæнадон царды. Сæрмагонд стипенди исыны фæнд кæнынц канд Цæгат Ирыстоны ахуыргæнинæгтæ нæ, фæлæ ма æндæр рæтты чи ахуыр кæны, ахæм фæсивæд дæр. Экспертон къамисы уæнгтæ равзæрстой 10 кандидаты. Семæ кæндзысты уæлæмхасæн ныхас. Æмæ уæд равзардзысты 6 стипендиаты. Алы стипендийы бæрц у 10 мин сомы. Фиддзысты йæ алы мæй афæдзы дæргъы. Уæ зæрдыл уын æрлæууын кæндзыстæм, Хъæбæлоты Билары номыл сæрмагонд паддзахадон стипендийы тыххæй уагæвæрд сфидар кодтой 2017-æм азы августы.
