филиал вгтрк государственная телерадиовещательная компания “Алания”

Æмбырдмæ хуынд æрцыдысты хæсты ветерантæ, фронты фæсчъылдым чи архайдта, уыдон. Бæрæгбоны арфæ сын ракодтой парти «Иугонд Уæрæсе»-йы цæгатирыстойнаг хайады политсоветы секретарь Токаты Людмилæ, парламенты депутаттæ æмæ физикон-математикон лицейы ахуырдзаутæ. Ветерантæ дзырдтой сæ мысинæгтæ, уæлахизы бонмæ куыд тырныдтой, æмæ цы зындзинæдты сæрты ахызтысты, уый. Æмбырды зæлыдысты хæстон зарджытæ, хистæртæ æрымысыдысты се мхæстонты. «Ахæм фембæлдтытæн ис стыр хъомыладон нысаниуæг. Ныртæккæ сæйрагдæр у, рæзгæ фæлтæры хистæрты хъæбатырдзинады дæнцæгыл хъомыл кæнын»,- загъта ветеранты Советы сæрдары хæдивæг Сабеты Виктор. Фæсивæд сæм лæвæрдтой фæрстытæ. Ветеранты царды нывтæ сæ бирæ хъуыдытыл бафтыдтой. Кæй зæгъын æй хъæуы, нæ бæстæйæн Уæлахизы бон у æппæтæй сæйрагдæр бæрæгбон, фæлæ 9-æм майыл хæстонтæ сæхæдæг сæмбæлынц иуæй цины, иннæмæй та æнкъард зæрдæйы ахастимæ.

Сабеты Виктор, РЦИ-Аланийы ветеранты Советы сæрдары хæдивæг: «Мах ацы бæрæгбонмæ тынг фенхъæлмæ кæсæм. Уымæн æмæ фенæм кæрæдзийы, аныхас кæнæм. Фæлæ хъыгагæн бирæ нал стæм, æмæ нын уымæ гæсгæ, 9-æм май тынг хъæлдзæг вæййы, зæгъгæ, зæгъын мæ бон нæу. Куыд фæзæгъынц, зæрдæ уынгæг фæкæны».