Йæ кусджытæн раарфæ кодтой газеты юбилейы фæдыл стæй сын бакодтой финансон æххуыс дæр. Республикæйы адæмон газет «Рæстдзинад» ныридæгæн ахызт йæ 90 азы сæрты.
Республикæйы адæмон газет «Рæстдзинад» ныридæгæн ахызт йæ 90 азы сæрты. Уый фæдыл йæ коллектив зæрдиаг арфæтæ райста Федерацийы Советы уæнг Хацъæты Олегæй æмæ Паддзахадон Думæйы депутат Хæдарцаты Махарбегæй. Газеты кусджытæ, сæ сæргъыл Фидараты Булат, афтæмæй хорзæхджынгонд æрцыдысты Федерацийы Советы кады грамотæйæ дæр, кæцы бафыста Валентинæ Матвиенко.
Хацъæты Олег, УФ-йы Федерацийы Советы уæнг: «Бузныг уын уæд уæ фæллойы тыххæй. Сымах фæрцы нæ царды хабæрттæ алы хæдзармæ дæр нæ мадæлон æвзагыл хæццæ кæнынц, æмæ уын бузныг уæд».
«Рæстдзинад» кæддæриддæр уыд ирон дзырды фарн хъахъхъæнæг. Абон газетæн йæ архайд финансон зындзинæдты тыххæй чысыл фæкъуылымпы. Уымæ гæсгæ Хацъæты Олег æмæ Хæдарцаты Махарбег бауынаффæ кодтой баххуыс кæныны тыххæй. Газеты тираж фæфылдæр кæнынæн самал кодтой 300 мин сомы.
Басаты Барис, Æппæтадæмон æхсæнадон змæлд «Стыр ныхас»-ы сæрдар: «Стыр лæгдзинад равдыстат, уæздандзинад æмæ ирондзинад, æмæ уæ цæрæнбон бирæ уæд».
Хацъæты Олег, УФ-йы Федерацийы Советы уæнг: «Ацы азы кæронмæ цас хъæуа, уыйбæрц уыдзæн. 300 уа, 400, уа 500 уа… Кæд хъæуа, уæд хъæутæм, ирон æвзаджы ахуыргæнджытæн газет рафыссæм. Уæхæдæг куыд хуыздæр банымайат, афтæ».
«Рæстдзинад»-ы коллективæн, стæй сын ахæм ахадгæ æххуыс чи бакодта, уыдонæн раарфæ кодтой газеты раздæры кусджытæ Мæхæмæтты Ахуырбег æмæ Дзасохты Музафер. Ацы ахсджиаг хъуыддаг газеты ныртæккæйы коллективæн дæр радта стыр ныфс.
Цгъойты Хазби, газет «Рæстдзинад»-ы бæрнон редактор: «Рæстдзинад» дæр, «Ногдзау» дæр, ирон æвзагыл цы газеттæ æмæ журналтæ цæуынц, уыдон нæ адæмæн сты царды хос. Æмæ сын стыр бузныг».
Газеты редакцийы ныртæккæ фæллой кæнынц 43 адæймаджы. Йæ фыццаг номыры рацыдæй нырмæ дзы чидæриддæр фæкуыста, уыдон сæ курдиатæй, сæ рæстзæрдæдзинадæй архайдтой газеты номæн аккаг уæвыныл.
Фæрниаты Мæдинæ
