Архайдтой дзы 6 азæй 16 азы онг кæуыл цæуы, ахæм 300 сывæллонæй фылдæр республикæйы 178 скъолайæ. Хуыздæр куыстытæ хаст æрцыдысты журналмæ. Рауагътой дзы 1000 экземпляры. Куыд ахуыргæнæн чингуытæ сæ байуæрстой республикæйы скъолатыл.
«Конституци сывæллæттæн». Конкурс цыди æртæ мæйы дæргъы. Архайдтой дзы нæ республикæйы сæдæ æвдай аст скъолайы ахуырдзаутæ. Æдæппæтæй 300 сывæллоны æхсæзæй – æхсæрдæс азы онг кæуыл цæуы, ахæмтæ. Равзæрстой дзы æртын дыууæ нывы. Æмæ уыдон хаст æрцыдысты æмбырдгондмæ. Юридикон терминтæ æмæ сæм нывтæ иумæ хорз сфидыдтой. Алы сыфыл дæр Цæгат Ирыстоны сæйраг закъоны хицæн статья. Уыимæ фыст сты дыууæ æвзагыл – уырыссаг æмæ ирон. Ацы куыст баст у нæ республикæйы Конституцийы юбилеимæ. Ацы аз ыл æххæст кæны 20 азы. Цæмæй йæ скъоладзаутæ дæр зоной, уый тыххæй бакустой Конституцион тæрхондоны.
Бузарты Нинæ. РЦИ-Аланийы Конституцион тæрхондоны хайады хицауы хæдивæг: «Конституци зын æрмæг у. Æрмæстдæр статьятæ, æнæ уæлдай ныхæстæй. Официалон стиль. Уымæ гæсгæ æнцон куыст нæ бакодтам».
Æмбырдгонд рацыд иу мин экземплярæй. Фæлæ уый сфаг и æппæт скъолатæн дæр. Ныр хъуамæ алы скъолайы дæр арæзт æрцæуой гом уроктæ. Сæ фыццаг уыд Дзæуджыхъæуы фæндзæм гимназы. «Сывæллæттæн Конституци» райстой паддзхадон оргæнтæ дæр. Æмæ хуымæтæджы нæ, йæ автортæ куыд зæгъынц, афтæмæй ахæм æмбырдгонд æппæт Уæрæсейы у иунæг. Конкурсы уæлахиздзаутæн кад кодтой нæ республикæйы хицауады хæдзары. Ахуырады æмæ наукæйы министры фыццаг хæдивæг Тотраты Владислав куыд загъта, афтæмæй ацы куысты фæрцы сывæллæттæ иуæй сæ курдиат раргом кодтой, иннæмæй та равдыстой сæ хъуыдытæ граждайнаг æхсæнады тыххæй. Конкурсы чи архайдта, уыцы куыстытæ равзарын æнцон хъуыддаг нæ разынд. Бæрнон къамисы сæргъы уыд зындгонд нывгæнæг Саулаты Сергей. Профессионалон цæстæнгасæй кæсгæйæ аргъ скодта æвзонг курдиæттæн.
Грамотæтæй уæлдай ма сывæллæттæн радтой арфæйы фыстæджытæ, стæй æхцайы премитæ дæр.
Кцойты Алинæ, Елхоты 2-æм скъолайы ахуырдзау: «Æз мæ нывы равдыстон адæмагæн бар цæмæн ис, уый. Хъуамæ йын уа фæлладуадзæн рæстæг, æмæ æндæр хъуыддæгтæ».
Туаты Дианæ, Елхоты 2-æм скъолайы ахуырдзау: «Æз сныв кодтон лæппу æмæ чызджы, æмæ сæ фыццаг цъарыл бакодтой. Иннæ куыстытæ та мидæгæй сты».
Æмбырдгондмæ цы куыстытæ бахастой, уыдон феныны фадат уыдзæн се ппæтæн. Конституцийы бонмæ 12-æм ноябрьмæ нысан кæнынц сывæллæтты нывты равдыст саразын.
