Уæрæсейы цалдæр регионы парахат кæны гриппы æмæ хæцгæ низты инфекци. Цæгат Ирыстоны уавæр тæссаг нæу. Дохтыртæ куыд зæгъынц, афтæмæй рынчынты нымæц фæфылдæр, фæлæ уый эпидемийыл банымайæн нæй.
Аслæмырзаты Наталья поликлинимæ æрбацыд йæ 2 чызгимæ. Алинæ æмæ Альбинæ суазал сты. Фæлæ афойнадыл гриппы ныхмæ прививкæтæ кæй скодтой, уый тыххæй 4 бонмæ адзæбæх сты. Ныр æрбацыдысты рынчыны гæххæттытæм скъоламæ æмæ рæвдауæндонмæ. Уæвгæ, республикæйы вакцинаци райдыдта фарон октябры. Прививкæтæ скодтой 170 мин адæмагæй фылдæрæн. Фæлхасадмæ цæстдарды управленийы куыд зæгъынц, афтæмæй ахæм уколты фæрцы фæстаг азты рынчынты нымæц къаддæр кæны.
Гадзиаты Галинæ, фæлхасадмæ цæстдарды цæгатирыстойнаг управленийы разамонæджы хæдивæг: «Кæд-иу раздæр адæм тынг рынчын кодтой 5-6 къуырийы дæргъы, уæд, зæгъæм, фарон низтæ эпидемийы хуызы уыдысты æрмæстдæр иу къуыри. Прививкæ кæнын хъæуы, низ куы стыхджын вæййы, уæдæй æппынкъаддæр 2 къуырийы раздæр, цæмæй адæймагмæ вирустæм иммунитет фæзына».
Декабрæй фæстæмæ республикæйы фылдæр кæны хæцгæ низты инфекцийæ рынчынты нымæц. Дзæуджыхъуы 7-æм поликлиникæ лæггад кæны 14 мин сывæллонæй фылдæрæн. Ныртæккæ сæм бонмæ хæцгæ низты тыххæй медицинон æххуысмæ æрбадзуры 80 адæмаджы бæрц. Дохтыртæ сæм фæцæуынц сæ хæдзæрттæм.
Плиты Фузæ, Дзæуджыхъæуы 7-æм поликлиникæйы сæйраг дохтыры хæдивæг: «Ис нæм гриппы æмæ хæцгæ низты инфекцийы ныхмæ хостæ. Дохтыртæ алы бон дæр цæуынц сывæллæттæм, бæрæг сæ кæнынц, дзæбæх сæ кæнынц. Цы æмбæлы, уыцы медицинон æххуыс исынц сывæллæттæ. Мах архайдзыстæм, цæмæй сæ нымæц ма фæфылдæр уа».
Ныридæгæн республикæйы хæцгæ низты инфекци кæмæ ис, уыдон сты мин æмæ фондзсæдæйы бæрц. Гриппæй нырма ничи фæрынчын. Адæммæ ис парагриппозы, респираторон-синцитиалон æмæ аденовирустæ. Ахæм уавæр эпидемийыл банымайæн нæй. Рынчынты нымæц уыцы æмвæзадæй у 13 æмæ 2 % къаддæр.
Уæрæсейы 8 субъекты гриппы æмæ хæцгæ низты инфекци парахатдæр кæны. Уый тыххæй фехъусын кодта бæстæйы сæйраг санитарон дохтыр Геннадий Онищенко. Цæгат Ирыстоны тæссаг уавæр нæй. Фæлæ дохтыртæ сидынц адæммæ, цæмæй сæхи хъахъхъæной, уымæн æмæ ацы низтæ стыхджын вæййынц февралы æмæ мартъийы.
Хъайтмазты Дзерассæ
