Цæгатирыстойнаг интернет-тыгъдады уый тыххæй бирæ æрмæг фæзынд. Адæм фыссынц сæ хъуыдытæ. Фæлæ афтæ зæгъæн нæй, æмæ нæ командæйæн уый æнæнхъæлæджы хъуыддаг уыди. «Алани» зындзинæдтæ æййæфта ныр цалдæр азы.
Абайты Руслан 30 азæй фылдæр йæ цæст дардта æмæ хæцыди футболон клуб «Аланийы» фарс. Куыд фæзæгъынц, йæ алы фезмæлд дæр ын зыдта. Фæлæ абон хъуыддаг цæхгæр аивта. Футболон клуб нал кусы. Футболуарзæг куыд зæгъы, афтæмæй дзы цымæ исты хи дзаума фесæфт, афтæ йæм кæсы.
Клубы президент Гæззаты Валерийы хъуыдымæ гæсгæ, командæ архайдта бæлвырд программæмæ гæсгæ, фæлæ дзы цы зындзинæдтæ сæвзæрд, уыдон фæкъуылымпы кодтой футболон клубы куыст. Уымæ гæсгæ, «Аланийæн» йæ бон дарддæр архайын нал у. Ист æрцыд чемпионатæй. Гæззаты Валерийы ацы хус ныхæстæм футболуарзджытæм иухуызон цæстæнгас нæ разынд. Гæнæн ис, æмæ йыл адæм сахуыр сты æндæрхуызонæй. Клубы президент-иу йе ‘нкъарæнтæ не ‘мбæхста, нæ тренировкæты рæстæг, нæ разамонæджы бынаты. Чи зоны, æмæ клубы разамынд рагæй æнкъардта, «Аланимæ» цы фидæн æнхъæлмæ кæсы, уый. Æмæ сæм тых нал баззад стыр æнкъарæнтæ равдисынæн. Стæй дзы раст зæгъгæйæ, хъыг кæнгæйæ дæр ницыуал рауайдзæн. Республикæйы цæрджытæй бирæтæн ацы хъуыддаг у стыр трагедиау.
Фæлæ æнæ ‘хцайæ уæддæр къухы бафтыд сывæллæтты скъола, фæсивæдон командæ «Алания Д» бахъахъхъæнын. Гæнæн ис, æмæ та искуы Цæгат Ирыстоны фæстæмæ æрлæудзæн стыр футболы рæстæг. Ууыл йæ зæрдæ дары Гæззаты Валерий дæр. «Ног стадион æмæ сывæллæтты футболон академийы арæзтады проекттæ æххæстгонд цæуынц дарддæр. Проекты иу хайæн уал æхца фыст æрцыд. Фидæны республикæйы уыдзæн нырыккон стадион, æмæ сывæллæтты футболон академи», зæгъы Гæззаты Валерий.
«Аланийæн» уыди хорз рæстæджытæ, фæлæ-иу зындзинæдтæ куы æвзæрста, ахæм бонтæ дæр фаг. Футболуарзджыты командæ сахуыр кодта, стыр уæлахизтыл дæр, стæй фæхæрдуæвæг уавæрыл дæр. Фæлæ уæддæр алы рæстæджыты командæйæ республикæйы цæрджытæ уыдысты сæрыстыр. Йæ уæлахизтæй адæмæн хаста циндзинад.
12 азæй фылдæр футболон клуб «Алани» зындзинæдтæ æвзæрста æхцайы фæрæзтæй, арæх ивтой йæ тренертæ. Уый æвзæры `рдæм зынди хъазтыл. Къаддæр кодтой хи фæзыл матчтæ. Ацы сезон хъазт фæнывыл дæр. Фæлæ, «Алани» чемпионатæй ист æрцыд, зæгъгæ, хъусынгæнинаг разынд хъысмæтхæссæг, æмæ хуыздæр азты футболуарзджытæй дзаг чи уыди, уыцы стадион ныр дæргъвæтин рæстæгмæ сафтид.
