Кусынц йыл Хуссар Æфсæддон зылды специалисттæ
«Уæлахизы Эшелон» – афтæ схуыдтой агитацион-рухстауæн акци, стæй æфсæнвæндаджы транспорты хуыз. Ныртæккæ йыл кусынц Хуссар Æфсæддон зылды специалисттæ. Йæ пресс-службæ куыд хъусын кæны, афтæмæй составы уыдзæн цалдæр тематикон вагоны æмæ платформæйы. Зæгъæм, иу вагонмæ бацæугæйæ, бæлвырд базонæн уыдзæн зындгонд къорд СМЕРШы историимæ, иннæйы та дзурдзысты хæстон дохтырты тыххæй. Цыппар вагоны фестдзысты мобилон музейон экспозицитæй. Дзурæг уыдзысты Сталинграды, Кавказ суæгъд кæныны тохты, Севастополь хъахъхъæныны тыххæй стæй нырыккон æфсады тыххæй дæр. 6 гом фæзы равæрдзысты Фыдыбæстæйы Стыр хæсты рæстæг Сырх Æфсады хæцæнгарзы дæнцæгтæ. Уыдон та сты — легендарон хæстон техникæйы хуызтæ: танк Т-34, реактивон системæ «Катюша», æмæ афтæ дарддæр. Уыдзæн ма дзы иу ног платформа, бæлвырддæр та — концерттæ аразæн фæз. «Уæлахизы Эшелон» æрзилдзæн Хуссар æфсæддон зылды территорийыл, æрлæудзæн 20 æфсæддон намысы горæты, Уæрæсейы Федерацийы субъектты сæйраг сахарты, æфсæнвæндаггон станцæты. Акци баст у Стыр Уæлахизы 75 азы бонимæ, æмæ фæуыдзæн Ростовы, 8-æм майы.
