Ацы бонты йæ бабæрæг кодтой парти «Иугонд Уæрæсейы» минæвæрттæ
Кады аккаг сты, Фыдыбæстæйы Стыр хæст йæхи цæстæй чи федта, æмæ Уæлахиз чи хæстæг кодта, уыцы хъæбатыртæ. Сæ иу – нæ программæйы хъайтар Алексей Шевченко. Ацы бонты йæ бабæрæг кодтой парти «Иугонд Уæрæсейы» минæвæрттæ. Зонынц æй, куыд ахсджиаг у кадджын хистæртыл аудын, уый. Ветераны тыххæй бæстондæр радзурдзæн Хъайтмазты Дзерассæ.
Ацы кадртыл Алексей Шевченкойыл цæуы 94 азы æмæ ахуыр кæны машинæйыл цæуын. Ам та йыл цæуы 96 – зæрдиагæй зилы йæ цæхæрадонмæ. 2022-æм аз. Фыдыбæстæйы Стыр хæсты ветеран бæрæг кæны Алагир фашистты оккупацийæ уæгъд кæныны 80 азы бон. Ныртæккæ Алексей Шевченкойыл цæуы 99. Йе нусон юбилейыл сæмбæлдзæн иннæ аз. Алагиры районы иунæг ветераны раз æдзух сты йæ цыппаркъахыг хæлæрттæ – куыдз Черныш æмæ 5 гæдыйы.
Алексей Шевченко фронтмæ ацыд 44-æм азы, Ленинграды блокадæ куы систой, уæд. Уæлахизыл дæр уым сæмбæлд. Уый фæстæ службæ кодта Дард Скæсæны. 45-æм азы бавзæрста советон-япойнаг хæсты цæхæр дæр. 50-æм азы демобилизацигонд æрцыд. Хæсты фæд баззад æрмæст йæ зæрдæйы нæ. Ветеран хъусæй тынг æвзæр хъусын райдыдта. Æрмæст йе нæниздзинад цудыд нæу. Алексей Шевченкойы хæдзар у базилинаг. Кæддæр ацы самандурæй конд хæдзар йæхæдæг сарæзта. Уымæ гæсгæ йын дзы алцыдæр зынаргъ у.
Хистæр фæлтæрыл аудындзинад у «Иугонд Уæрæсе»-йы адæмон программæйы сæйрагдæр къабæзтæй иу. Партийы минæвæрттæ зонынц, ветерантимæ ахæм фембæлдтытæ куыд ахсджиаг сты, уый. Куыд зæгъынц, афтæмæй сæ хъæуы æрмæст бæрæг кæнын нæ, фæлæ архайын Стыр Уæлахизы алы хъæбатыры цард хуыздæр кæныныл.
Цæгат Ирыстоны ма абон цæры 17 ветераны. Сæхи цæстытæй федтой хæсты зындзинæдтæ, сæ зæрдæйы дарынц Уæлахизы цин. Алчидæр сæ у – нæ бæстæйы фидардзинады æмæ лæгдзинады символ.
