Ахуырады процесс цæуы æмхæццæ хуызы
Республикæйы уæлдæр ахуыргæнæндæтты архайынц æппæт мадзæлттæ аразыныл, цæмæй коронавирусы инфекци ма парахат кæна, уый тыххæй. Ахуырады процесс цæуы æмхæццæ хуызы. Уыимæ æххæст кæнынц фæлхасадмæ цæстдарды управленийы æппæт амынддзинæдтæ. Бæлвырддæр радзурдзæн Фидараты Маринæ.
Хæххон паддзахадон аграрон унивесритеты ахуырадон процесс цæуы хуымæтæг хуызы. 3000 стдентæй фылдæр цæуынц лекцитæм, практикон æмæ лабраторон ахуыртæм. Æрмæст æххæст кæнынц æдасдзинады домæнтæ. Дарынц маскæтæ, аудиторитæ скæнынц дезинфекци. Уыцы мадзæлтты фæрцы ахуырады процесс кæны æдасдæр.
Цæгат Ирыстоны паддзахадон университеты та ахуыры аз райдыдта боныгон ахуыры хуызы, фæлæ дардмæ ахуырады элементтимæ. Стандартмæ гæсгæ ахуыртæ цæуынц, 30 адæймагæй фылдæр кæм нæй, ахæм аудиториты. Уыимæ студенттæн сбарынц сæ тæвд, алы корпусмæ бацæуæны дæр ис санитайзертæ. Фæлхасадмæ цæстдарды управленийы амынддзинæдтæ æххæстгонд цæуынц. Дардмæ куысты хуызмæ раивтой, 65 азæй фылдæр кæуыл цæуы, уыцы ахуыргæнджыты.
Цæгат Кавказы хæххон металлургон институты дæр ахуырадон процесс цæуы æмхæццæ хуызы. Фыццæгæмкурсонтæ лекцитæм цæуынц се ппæт дæр. Дыккæгæмæй-фæндæзм курсы онг ахуырдзаутæн та фадат ис лекцитæм онлайн хуызы хъусынæн, фæлæ сæ практикон ахуыртæм цæуын хъæуы. Уæлдæр ахуыргæнæндоны ацы куысты хуызыл ныридæгæн сахуыр сты.
Скъолатæм æмæ рæвдауæндæттæм сывæллæттæ куыд цæуынц, уымæ бæстон цæстдард цæуы Дзæуджыхъæуы ахуырады управленийы рдыгæй. Алы бон дæр специалисттæ иумæйаг бæрæггæнæнтæ арвитынц ахуырады министрадмæ æмæ фæлхасадмæ цæстдарды управленимæ. Искæмæ коронавирусы миниуджытæ куы раиртасой, уæд æй æвæстиатæй арвитынц дардмæ ахуырадмæ.
Уымæй дарддæр ма рæвдауæндæтты низ парахат кæныны тыххæй сæхгæдтой æртæ къорды. Фæрынчын дзы иу сывæллон æмæ дыууæ кусæджы.
