Уый руаджы, бæрзонд квалификаци кæмæ ис, ахæм педагогтæ кусынц хъæуты, стæй 50 мин адæймаджы онг цы горæтты цæры, уым
Уæрæсейы 2020-æм азæй фæстæмæ æххæстгонд цæуы программæ «Хъæуккаг ахуыргæнæг». Уый руаджы, бæрзонд квалификаци кæмæ ис, ахæм педагогтæ кусынц хъæуты, стæй 50 мин адæймаджы онг цы горæтты цæры, уым. Алы аз проекты фæлгæты саразынц конкурс. Уый уæлахиздзаутæ свæййынц хъæуккаг сывæллæтты зондамонджытæ. Абон радзурдзыстæм ахæм ахуыргæнджытæй дыууæйы тыххæй. Кусынц Кæрдзыны. Бæлвырддæр радзурдзæн Чехойты Фатимæ.
Алгебрæйы хæслæвæрдтæ 9-æм къласы кадеттæн программæйы хуымæтæг æрмæг нæу, у сæ ахуырадон процесс *вдисæг. Цалдæр азы сын математикæйы ахуыргæнæг нæ уыд. Ныр сын Реуазты Зæлинæ алы бон дæр æмбарын кæны теоремæтæ. Архайдта «Хъæуккаг ахуыргæнæджы» программæйы. Кæрдзын йæхæдæг равзæрста. Куыд зæгъты, уымæ гæсгæ йæ уидæгтæ ардыгæй сты. Ныр йæ сæйраг хæс у сывæллæттæн арф зонындзинæдтæ дæттын.
Ахуыргæнæгмæ ис стыр фæлтæрддзинад. 22 азы размæ *рбацыд скъоламæ. Республикæйы хуыздæр ахуыргæнæндæтты хыгъды Æрыдонæй цы 1-æм скъола ис, уый баивта хъæуккаг ахуыргæнæндоныл. Куыд зæгъы, уымæ гæсгæ фæсмон ницæуыл кæны. Реуазты Зæлинæ контрактмæ гæсгæ ам хъуамæ бакуса 5 азы.
Кæрдзынмæ ахуыргæнæг цæуы Æрыдонæй. Кæд уый æнцон нæу, уæддæр йæ размæ цы хæс ис – скъоладзаутæн арф зонындзинæдтæ дæттын, уыимæ абаргæйæ, йын стыр зындзинад нæ хæссы. Кусы æнгом коллективы. Уый та йын у стыр æххуыс.
Уырыссаг æвзаджы уроктæ цæуынц сыхаг кабинеты. Ам 8-æм къласонтæ иртасынц дзырдты арæзт. Сæ ахуыргæнæг дæр у программæ «Хъуккаг ахуыргæнæджы» архайæг. Уый дæр Æрыдоны скъола баивта Кæрдзыны ахуыргæнæндоныл.
3 азмæ Тахохты Бэлæ сси хиуон ахуыргæнджытæн æмæ скъоладзаутæн. У домаг, уыимæ цæстуарзон – афтæ дзы зæгъынц скъоладзаутæ. Сывæллоны зæрдæйæн та асайæн нæй.
Горæтаг скъола хъæуккагыл баивын бирæты нæ бафæнддзæн, уæлдайдæр та æрыгон зондамонджыты. Программæ «Хъæуккаг ахуыргæнæджы» архайд у стыр бæрнондзинад. Фæлæ ногдзинæдтæй тæрсын нæ хъæуы, зæгъынц, уыцы къахдзæф чи скодта, уыдон.
Ацы скъолайы специалисттæ цалдæр азы нæ фаг кодтой. Педагогтæ кæрæдзийы ивтой, афтæ цыд ахуырадон процесс. Уымæн та уыд йæхи зындзинæдтæ. Ныр скъолайы кусы 25 ахуыргæнæджы, уыдонæй дыууæ – программæйы уæлахиздзаутæ.
Кæрдзыны скъолайы ис 250 ахуыргæнинаджы. Уыдонæй 87 зонындзинæдтæ исынц зæронд бæстыхайы. 60 азы лæггад кæны хъæуы цæрджытæн. Ацы аз æрцыд бындурон цалцæг. Ног ахуыры аз райдыдта ноггонд кабинетты. Уыдон ифтонг цæуынц хъæугæ æрмæгæй.
Кæрдзыны скъолайы фадæттæ азæй азмæ кæнынц хуыздæр. Ахуыргæнæндон æмдзу кæны рæстæгимæ. 2021 азы дзы байгом дыууæ кадетон къласы. Ахуырдзаутæ скъолайы кад фæхъахъхъæнынц алыхуызон конкурсты. Къæпхæнгай лыггонд цæуы специалисттæй æххæст кæныны фарст, уыимæ программæ «Хъæуккаг ахуыргæнæнджы» руаджы дæр. Педагогтæ сæ размæ æвæрынц ахсджиаг хæс – скъоладзауты афтæ цæттæ кæнын, цæмæй уыдон сæ зонындзинæдтæм гæсгæ сæ горæтаг æмгæрттæй дæлдæр ма уой.
