Арæзт æрцыд Цæгат Ирыстоны 21-æм июлы, æмæ фæци 3-æм августы
Куыд ма хъусын кодтам, афтæмæй национ проект «Ахуырад»-мæ гæсгæ, Уæрæсейы 29 регионæй 300 лæппу æмæ чызгæй фылдæр архайдтой æвзонг туристты Æппæтуæрæсеон æмбырды кæронбæттæн къæпхæны. Арæзт æрцыд Цæгат Ирыстоны 21-æм июлы, æмæ фæци 3-æм августы. Уæлахиздзаутæн раарфæ кæнынмæ æмæ йæ архайджыты фарс рахæцынмæ Дыгургомы альплагерь «Комы-Арт»-мæ уазæгуаты æрбацыд нæ республикæйы Сæргълæууæг Сергей Меняйло. Фæсивæдæн ма зæрдиаг арфæтæ ракодтой хъомылады фарстаты, уæлæмхасæн ахуырады æмæ сывæллæтты фæллауд уадзыны паддзахадон политикæйы департаменты директор Наталья Агре, стæй Цæгат Ирыстоны ахуырады æмæ наукæйы министр Алыбекты Эллæ. Сергей Меняйло куыд загъта, афтæмæй йæ зæрдæ дары, фæсивæдæн нæ уазæгуарзон ирон зæхх сæ зæрдæмæ кæй фæцыд, ууыл. Наталья Агре та арфæйы фыстæг бакасти Уæрæсейы рухстауынады министр Сергей Кравцовы номæй. Фæсивæдæн йæ зæрдæ загъта рухс фидæн æмæ ног æнтыстдзинæдтæ. Официалон хайы фæстæ æвзонг туристтæн фадат уыд Сергей Меняйломæ фæрстытæ радтынæн. Фæндыд сæ базонын йæ куысты, службæйы æмæ бинонты тыххæй, стæй Цæгат Ирыстоны туризмы рæзты тыххæй. Фæсивæд ахæм æргом ныхасæй баззадысты разыйæ.
Æдæппæтæй хицæн маршрутыл бæстæзонæн хæслæвæрдтæ сæххæст кодтой æмæ сæ проекттæ бахъахъхъæдтой 300 адæймаджы. Се ппæтæй дæргъвæтиндæр маршрут уыд 120 километры хæххон уавæрты, æмæ йæ конкурсанттæ сæххæст кодтой иттæг хорз. Туристтæн аргъ кодтой 15 тæрхонгæнæджы. Хуыздæртыл нымад æрцыдысты Кемеровы æмæ Белгороды облæстты, æмæ Республикæ Комийы минæвæрттæ. Туристон æмбырд саразыныл бакуыстой Уæрæсейы рухстауынады Министрад, Цæгат Ирыстоны Хицауад, стæй ахуырады æмæ наукæйы министрад.
