30 азы дæргъы разамынд дæтты, æрыгондзинад æмæ фæлтæрддзинад, классикæ æмæ нырыккон постановкæтæ кæм баиу сты, уыцы Академион Уырыссаг театрæн
Уæрæсейы адæмон артист, бæстæйы сæйраг театралон преми «Золотая маска»-йы лауреат Владимир Уваров сбæрæг кодта йе 75 азы бон. 30 азы дæргъы разамынд дæтты, æрыгондзинад æмæ фæлтæрддзинад, классикæ æмæ нырыккон постановкæтæ кæм баиу сты, уыцы Академион Уырыссаг театрæн. Йæ курдиатæн стыр аргъгонд æрцыд бæрзонд æмвæзадыл. Бæстондæр радзурдзæн Чехойты Фатимæ.
Академион уырыссаг театры, алы изæр дæр сценæйы занæвес кæм сисынц æмæ историтæ кæм райгас вæййынц – цард цæдджинагау фыцы. 30 азæй фылдæр ын разамынд дæтты Владимир Уваров. Йе сфæлдыстадон æрмдзæф бæрæг дары. Дæсгай рольтæ æмæ постановкæтæ. Чебутыкин «Æртæ хо»-йæ, Джон Смит «Слишком женатый таксист»-æй, Лопахин «Вишневый сад»-æй, кæнæ Яго спектакль «Отелло»-йæ. Владимир Уваровы курдиат у алывæрсыг.
Владимир Уваровы разамындæй театр сси, æрыгондзинад æмæ фæлтæрддзинад, классикæ æмæ нырыккон постановкæтæ кæм баиу сты, ахæм фæз. Сфæлдыстады сæрмагонд бынат ахсы хæсты темæ. Спектакль «А зори здесь тихие» нывонд у, Фыдыбæстæ чи хъахъхъæдта, уыдонæй алкæмæндæр. Аивадон разамонæг æмæ Уырыссаг театры директорæн театр хуымæтæг куысты бынат нæу, фæлæ у йæ дыккаг хæдзар, коллектив та – йæ бинонтæ.
Владимир Уваров йæ 75-æм азы бон арвыста йæ уарзон театры. Бæрæгбоны программæ байгом спектакль «Бесприданница»-йæ. Юбилярæн арфæтæ ракодтой артисттæ, хицауады минæвæрттæ, уазджытæ иннæ регионтæй. Йæ сæрмагонд хæсы тыххæй дзырдтой зындгонд политик Дзасохты Алыксандр æмæ Парламенты Сæрдар Тускъаты Таймураз.
Владимир Уваров – æрмæст ном нæу. У Цæгат Ирыстоны аивады æнæхъæн дуг. Йæ курдиатæн стыр аргъгонд æрцыд бæрзонд уæлвæзадыл. Фæлæ Уæрæсейы адæмон артист, бæстæйы театралон сæйраг преми «Золотая маска»-йы лауреат, æппæты стырдæр хæрзиуæгыл нымайы театрдзауты уарзондзинад.
