Райгуырæн бæстæйы æдасдзинадыл чи кусы, уыдоны службæ æнцон нæу
100 азы бæстæйы арæнтæ хъахъхъæнгæйæ. Уæрæсейы æдасдзинады федералон службæйы цæгатирыстойнаг управлени сбæрæг кодта йæ æнусы юбилей. Райгуырæн бæстæйы æдасдзинадыл чи кусы, уыдоны службæ æнцон нæу. Сæ бæрæгбоны фæдыл раарфæ кæнынмæ сын æрбацыди хицауады сæрдар Дзанайты Барис. Республикæйы сæргълæууæджы уынаффæмæ гæсгæ, арæнхъæхъхъæнæг управленийы ветерантимæ куысты хайады инструктор Валерий Устиновы схорзæхджын кодта «Ирыстоны Намыс»-ы майданæй. Сæ хæстæ иттæг хорз кæй æххæст кæнынц, уый тыххæй кады гæххæттыты аккаг систы ведомствæйы 8 кусæджы. 100 азмæ службæйы статус ивгæ дæр кодта, фæлæ сæ сæйраг хæстæ æмæ нысантæ сты æнæивгæ. Уый, фыццаджыдæр – æдасдзинад. Абон цæгатирыстойнаг арæнхъахъхъæнджытæ æххæст кæнынц Уæрæсе æмæ Гуырдзыйы, стæй Хуссар Ирыстоны паддзахадон арæнты æдасдзинадæн цыдæриддæр домæнтæ ис, уыдон.
