Ныхас цыд сæрмагонд æфсæддон операцийы архайджыты реабилитацийыл æмæ сын психологон æххуыс кæныныл
Уæрæсейы Æхсæнадон палатæйы æнæниздзинадхъахъхъæнынады фарстаты фæдыл Къамисы минæвæрттæ архайдтой Цæгат Ирыстоны кусæг æмбырды. Ныхас цыд сæрмагонд æфсæддон операцийы архайджыты реабилитацийыл æмæ сын психологон æххуыс кæныныл. Уазджытæ ма аргъ скодтой республикæйы медицинон куыстуæтты ифтонгдзинад. Бæлвырддæр хабæрттæ радзурдзæн Чехойты Фатимæ.
Сæрмагонд æфсæддон операцийы архайджыты реабилитаци, психологон-психиатрион æххуыс, сылгоймæгты æнæниздзинад, онкологон æмæ эндокринологон низтæ хынцгæйæ, куыстуæттæ кадртæй æххæст кæнын. Ацы æмæ æндæр фарстытыл дзырдтой республикæйы Æхсæнадон палатæйы. Ныхасы архайдтой Уæрæсейы Æхсæнадон палатæйы æнæниздзинадхъахъхъæнынады къамисы уæнгтæ.
Дзæуджыхъæумæ кусæг балцы чи *ссыд, уыдоны *хсæн ис Мæскуыйы æнæниздзинадхъахъхъæнынады Департаменты æнæштатон психиатр Георгий Костюк. Уый куыд фæбæрæг кодта, уымæ гæсгæ ныртæккæ ахсджиаг у бакусын цæфтæ чи райсы, уыцы адæмы æххуысы методикæйыл сæ уавæр сын фæрогдæр кæнынæн. Уый дзырдта, йæхæдæг куыст куыд фааразы, ууыл. Ныхасы архайджытæ бабæрæг кодтой æфсæддон госпиталь.
Æхсæнадон палатæйы уæнгтæ уыдысты Дзæуджыхъæуы 1-æм поликлиникæйы сылгоймæгты хайады. Медицинон куыстуаты сæйраг дохтыр Мецъаты Зæринæ сын радзырдта хайады тыххæй. Кусы дзы 13 акушеры. Ифтонг у УЗИйы æмæ иртæстытæн хъæугæ æндæр нырыккон техникон фæрæзтæй.
УФ-йы æмæ республикæйы Æхсæнадон палатæты уæнгты æмгуыстад ахадгæ у æнæниздзинадхъахъхъæнынады къабазæн. Уазджытæ Мæскуыйæ стыр аргъ скодтой регионы Æхсæнадон палатæйы уæнгты архайдæн.
Уæрæсейы Æхсæнадон палатæйы уæнгтæн Ирыстоны сæ кусæг балц ахæсдзæн цалдæр боны. Æфсæддон госпиталæй æмæ 1-æм поликлинæйæ уæлдай ма бæрнон кусджытæ бабæрæг кодтой Цæгат Ирыстоны медицинон академи дæр.
