Уазæг фыццаджыдæр бабæрæг кодта республикæйы онкологон диспансер æмæ федта, рынчынтæ цы уавæрты дзæбæх кæнынц, уый
Уæрæсейы æнæниздзинадхъахъхъæнынады министрады æнæштатон онколог Андрей Каприн ссыдис Дзæуджыхъæумæ. Уазæг фыццаджыдæр бабæрæг кодта республикæйы онкологон диспансер æмæ федта, рынчынтæ цы уавæрты дзæбæх кæнынц, уый. Андрей Капринæн уыдис кусæг фембæлд республикæйы сæргълæууæджы хæстæ рæстæгмæ æххæстгæнæг Сергей Меняйлойымæ. Мадзады архайдтой Хицауады Сæрдары хæдивæджы хæстæ рæстæгмæ æххæстгæнæг Александр Реутов æмæ æнæниздзинадхъахъхъæнынады министры хæстæ рæстæгмæ æххæстгæнæг Тебиаты Сослан. Бæлвырд дзырдтой нæ республикæйы онкологон службæйы куыст фæзуыздæр кæныныл æмæ дæсны кадыртæ бацæттæ кæныны фарстатыл. Уæлдай æргом аздæхтой, рынчынтæ хостæй куыд æххæст сты, уымæ. Уæ зæрдыл уын æрлæууын кæндзыстæм – ныртæккæ нæ республикæйы æнтыстджынæй æххæстгонд цæуы «Онкологон низтимæ тохы» федералон программæ. Йæ фæрцы фарон онкологон диспансеры æрæвæрдтой, Цæгат Кавказы æмбал кæмæн нæй, ахæм сæрмагонд ифтонгарз – тынты терапияйы аппарат. Андрей Каприн куыд загъта, афтæмæй йæ бон цæмæй уа, уымæй баххуыс кæндзæн регионы онкологон службæйæн дæсны кадыртæ бацæттæ кæныны хъуыддаджы. Уымæй уæлдай нæ республикæйы цæрджытæн сараздзæн телемедицинон консультацитæ. Æмбырды рæстæг куыд фæбæрæг кодтой, афтæмæй Цæгат Ирыстоны ис æппæт хъомыс, цæмæй дзы аразой наукон конференцитæ. Сæ фæцы нæ бæстæйы раззагдæр специалисттæ равлисдзысты онкологон низтæ дзæбæх кæныны æппæты хуыздæр æмæ нырыккондæр мадзæлттæ.
