Уый тыххæй бадзырд бафыста Уæрæсейы æнæниздзинадхъахъхъæнынады министр Михаил Мурашко
Уæрæсейы алы цæрæгæн дæр бар ис лæвар психологон æххуыс райсынæн. Уый тыххæй бадзырд бафыста Уæрæсейы æнæниздзинадхъахъхъæнынады министр Михаил Мурашко. Цæгат Ирыстоны ныридæгæн психологтæ лæггад кæнынц Дзæуджыхъæуы алы поликлиникæты дæр. Фидæны та психологон пункттæ байгом кæндзысты республикæйы алы районы дæр.
Æлборты Аленæ психологæй кусын райдыдта 7 азы размæ. Фыццаг та уыд банчы кусæг. Уæд хъуыды дæр нæ кодта, йæ дæсныйад æндæр къабазмæ раивдзæн, ууыл. Ныридæгæн кусы Дзæуджыхъæуы 1-æм поликлиникæйы. Куыд зæгъы, афтæмæй йæ кусты сæйраг хæрзиуæг у, адæм дзы разы кæй сты, уый.
1-æм июлы рацыд Уæрæсейы æнæниздзинадхъахъхъæнынады министр Михаил МурАшкойы бадзырд. Уымæ гæсгæ алы адæймагæн дæр бар ис лæвар медицинон æххуыс райсынæн. Уæлдай цæстдард цæуы сæрмагонд æфсæддон операцийы архайджытæм æмæ сæ бинонтæм. Æххуыс кæныны методтодтæ бирæ ис.
Медицинон кусджыты цæттæ кæны республикæйы медицинон – социалон психологон æххуысы центр. Уыцы центры директоры хæстæ рæстæгмæ æххæстгæнæг Абайты Ларисæ куыд зæгъы, афтæмæй специалисттæ иууылдæр сты, ацы къабазы бирæ азты чи фæкуыста, ахæм адæм. Уыдонæй иутæ сты, Беслæны теракты æмæ 2008-æм азы Хуссар Ирыстоны цы цаутæ рцыд, уыдоны фæстæ адæмæн чи ххуыс кодтой, ахæм специалисттæ. Психологтæн аразынц алыхуызон дæсныйад æвдисæг ахуыртæ æмæ дæсныйад уæлдæргæнæн курстæ.
Арæх вæййы афтæ, æмæ адæм дохтырæн сæ фарстатæ раргом кæнын тæрсгæ фæкæнынц. Фæлæ зын уавæры адæймагæн баххуыс кæндзæн психолог. Кусынц Дзæуджыхъæуы алы поликлиникæйы, стæй Горæтгæрон районы дæр. Фидæны фæнд кæнынц психолоджы лæггæдтæ скæнын республикæйы алы районы дæр.
