Евгений Вахтанговы номыл Уырыссаг Академион театры артисты сценæмæ алы рацыд дæр адæмæн уыд бæрæгбонау
Уæрæсейы Федерацийы адæмон æмæ Цæгат Ирыстоны сгуыхт артист Вячеслав Вершининыл сæххæст 80 азы. Евгений Вахтанговы номыл Уырыссаг Академион театры артисты сценæмæ алы рацыд дæр адæмæн уыд бæрæгбонау. Вячеслав Вершинины сфæлдыстадыл схъомыл сты цалдæр фæлтæры. Театры ахъазыд 200 ролæй фылдæр. Уымæй уæлдай йæхи равдыста æнтыстджын режиссерæй. Сæвæрдта 40 спектаклæй фылдæр. Йæ фыццаг спектакль «Стихийное бедствие» равдыстой 400 хаттæй фылдæр. Вячеслав Вершинин Вахтанговы номыл театры кусы ныр 50 азы бæрц. Культурæ æмæ аивадмæ стыр æвæрæн кæй бахаста, уый тыххæй йын лæвæрд æрцыд Хетæгкаты Къостайы преми, стæй Ирыстоны намысы майдан.
Царды фæндæгтæ йæ театрмæ æлвæстой йæ сабибонтæй фæстæмæ. Фыдыбæстæйы Стыр хæсты, хæлд хъысмæтты æмæ цæссыгты уылты. Театр сси йæ уд ирвæзынгæнæг, йæ цард.
Вячеслав Григорьевич стыр сценæ бауарзта, фыццаг къахдзæфтæ йыл куы скодта, уæд. Йæ бæллиц уыд Шекспиры æнæхъæнæй ахъазын. Уымæй дарддæр – Мольеры æмæ Островскийы. Украинаг театрты та уыди æндæр репертуар. Фæлæ хъысмæт йæ мидбылты бахуыдти æрыгон актермæ, æмæ Харьковмæ настрольты ссыди Смоленскæй театры труппæ.
Ирд, хæрзконд æмæ мидбылты худаг чызг, раст хуссайраг хуры хуызæн. Афтæмæй федта Вячеслав йæ фидæны цардæмбал Александрæйы. Уæдæй фæстæмæ, зæгъæн ис, æмæ сси йæ зæрдæйы хицау.
Дзæуджыхъæумæ Вершининтæ ссыдысты 1967-æм азы. Сæ курдиатæн сын аргъ скодтой æвæстиатæй, æмæ сæ райстой Уырыссаг театры труппæмæ. Революционер Абайты Владимиры сурæт саразгæйæ, спектакль «Навстречу жизни»-йы Вячеслав Вершинины схорзæхджын кодтой Хетæгкаты Къостайы премийæ. Æмæ уый уыд йе сфæлдыстадон фæндаджы райдиан.
Иннæтæ цæмæ бæллыдысты, уый Вячеславæн уади æнцонтæй. 200 ролæй фылдæр сфæлдыстадон царды 55 азмæ. Вершинин ахъазыд Горькийы, Булгаковы æмæ Островскийы хъайтарты, зæгъæн ис, æмæ се ппæты дæр. Арф психологи æмæ сцæнæйæн æгæрон лæггад – алы обрæз дæр цыди йæ зæрдæйы уылты.
Актер æмæ режиссер. Фылдæр ын цы хæстæгдæр у, уымæн дзуапп Вячеслав йæхæдæг дæр нæ ратдзæн. Уымæн æмæ дыууæ куысты дæр у æнтыстджын. Йæ фыццаг спектакль сæвæрдта Уырыссаг театры сценæйы 68-æм азы. Абоны онг ын ис 37 режиссерон куысты. Се хсæн комедитæ дæр. Мастерæн уый у йæ уарзон жанр. Йе 80 азы юбилей Вячеслав Вершинин сбæрæг кодта йæ бинонты хсæн. Йæ цардыл афæлгæсгæйæ йæхи нымайы тынг амондджын адæймагыл, æмæ йæ хъысмæтæн зæгъы æгæрон бузныг.
