Ахæм уынаффæ Цæгат Ирыстоны сæргълæууæг Сергей Меняйло рнахаста аппаратон æмбырды
Уæрæсейы хъæбатыр Тыбылаты Мараты ном ратдзысты Дæллаг Санибайы, æфсæддоны бинонтæ кæм цæрынц, уыцы уынгæн. Ахæм уынаффæ Цæгат Ирыстоны сæргълæууæг Сергей Меняйло рнахаста аппаратон æмбырды. Уымæй уæлдай, хъæбатыры ном хæсдзæн республикæйы скъолатæй иу. Сергей Меняйло бахæс кодта, хæстæгдæр рæстæг Тыбылаты Мараты хæтæджытимæ аныхас кæнын, цæмæй хъæбатырæн равзарой цыртдзæвæн. Æмбырды ныхас цыди Арвы комы фæндагыл дæр. Хицауады сæрдары хæдивæг Икъаты Русланбег куыд загъта, афтæмæй арæнты сæрты ахизынмæ рады лæууынц 1550 уæзласæн машинæйы. Сергей Меняйло ма дзуаппдæттæг структурæтæн бахæс кодта, Дзæуджыхъæуы историон хайы сæрдыгон верандæтæ æвæрыны фæткыл бакусын. Æнæнхъæлæджы цаутыл дзургæйæ Александр Хоружий фехъусын кодта хæхты тæссаг у зæйтæ рацæуынæй, стæй дзы арæх фезгъæлынц дуртæ. Ацы къуыри боны ахаст кæй февзæрдæр уыдзæни, уый аххосæй гæнæн ис æмæ æхгæд æрцæудзæн Арвы комы фæндаг æмæ Транскам. Республикæйы эпидемиологон уавæр фæхуыздæр. Ахуырады æмæ наукæйы министр Алыбекты Эллæ куыд загъта, афтæмæй республикæйы карантины æхгæд ахуыргæнæндæттæ нæй. Сергей Меняйлойы хæслæвæрдтæй иу уыди горæты къæвдаты дæттæ кæдæм цæуынц, уыцы бынæтты уавæрмæ æркæсын, цæмæй уынгты дон ма æмбырд кæна.
