Цæгат Ирыстонмæ дзы хауы 12 милуан сомы
Уæрæсейы Хицауады резервон фонд регионтæн фæрæзтæ дих кæны промышленносты райрæзтæн. Цæгат Ирыстонмæ дзы хауы 12 милуан сомы. Хардзгонд æрцæудзысты уæлæмхасæн процентты фиддонтыл. Ахæм хуызы регионалон фонды капитализаци ацы аз схиздзæн 260 милуан соммæ. Ууыл ныхас цыди республикæйы Хицауады æнæрадон æмбырды. Ныртæккæйы уавæрты промышленносты къабаз у æххуыс хъуаг. Уымæ гæсгæ, федералон центрæй цы фæндон рацыд, уый у ахадгæ, загъта Дзанайты Барис. Уæ зæрдыл уын æй лæууын кæнæм, промышленносты рæзты регионалон фонды капитализаци федералон фæрæзтæй сæххæст кæнын ацы азы мартъийы бахæс кодта бæстæйы Президент. Ахæм хъуыдымæ æрцыди, регионтæн социалон-экономикон æххуыс бакæныны æмбырды хатдзæгтæм гæсгæ. Ацы хъуыддæгтæн Уæрæсейы Хицауад радих кодта 4 миллиардæй фылдæр. Федералон æхцатæ фадат ратдзысты бæстæйы 77 регионы промышленносты рæзтæн. Ацы ногдзинæдтæ сты, санкциты рæстæг экономикæ фæцудын ма бауадзыны комплексон мадзæлтты иу хай.
