Ныхас цыд нæ бæстæйы субъектты вакцинацийыл
Уæрæсейы Хицауады Сæрдары хæдивæг Татьяна Голикова видеоконференци сарæзта æмбырд. Ныхас цыд нæ бæстæйы субъектты вакцинацийыл. Хицæн регионты разамонджытæ радзырдтой ныртæккæйы уавæры тыххæй, стæй коронавирус парахат кæнын ма бауадзынын тыххæй цавæр мадзæлттæ арæзт цæуынц, уый тыххæй. Цæгат Ирыстоны уавæры тыххæй радзырдта республикæйы Сæргълæууæджы хæстæ рæстæгмæ æххæстгæнæг Сергей Меняйло. Абоны онг нæм прививкæтæ скодтой 113 мины 200 адæймаджы. Сæйраг вакцинацийы пункттæй дарддæр ма фельдшерон-акушерон пунктты æмæ амбулаториты кусынц 47 пункты. Уæлæмхасæн архайынц 32 мобилон бригады. Медиктæ æмæ волонтертæ фæцæуынц хъæутæм, бынæттон цæрджытимæ скæнынц медицинон æркаст æмæ семæ кæнынц æмбарынгæнæн куыст иммунизацийы фæдыл. Стыр æргом здахынц ацæргæ адæммæ. Уæдæ бæстон цæстдард цæуы, йæхи амбулаторон уагæй чи дзæбхæ кæны, уыдонмæ дæр, загъта республикæйы Сæргълæууæджы хæстæ рæстæгмæ æххæстгæнæг.
