Проект æххæстгæнгæйæ ног кинотеатр фæзынди Елхоты дæр.
Дыууæ азы размæ цы сæрмагонд программæ рацыди царды, уый æххæстгæнгæйæ Уæрæсейы Кинойы Фонд хъæуты кинотеатртæ байгом кæныны тыххæй радих кодта 5-гай милуантæ. Проект æххæстгæнгæйæ ног кинотеатр фæзынди Елхоты дæр. Алцыдæр хорз, ног гæнæнтæ, ног кусæнгæрзтæ, æмæ киноуарзджытæн хорз фадæттæ. Æрмæст, йæ рæстæджы нæ ахъуыды кодтой, бынæттон культурæйы хæдзары цы сфæлдыстадон къордтæ архайы, уыдоны хъысмæтыл. Бæлвырддæр та сын сценæйы нал ис бынат. Уымæн æмæ кинотæ æвдыст хъуамæ цæуой бæлвырд фæткмæ гæсгæ.
Елхоты афæдзы размæ нырыккон кинотеатр куы байгом, уæд бынæттон кинотеатры сценæйы æвзонг зарæггæнджытæн æмæ кафджыты къордæн бынат нал баззад. Æрмæст национ кафты ансамбль «Хурзарин»-ы архайы 100 адæймагæй фылдæр. Æнуд фойейы уавæртæ раппæлинаг не сты.
Лыггæнинаг фарстатæ сæм ис 2. Боныгон æмæ æрвылбоны киносеанстæм зæгъæн ис, æмæ ничи цæуы. Нæ сын æххуыс кæнынц дунеон премьерæты афишæтæ дæр. Уый хыгъд, дзæгъæл лæуд чи кæны, уыцы сценæ ансамблæн радтыны фадат дæр нæй. Закъонмæ гæсгæ, кино хъуамæ равдисой, залы æрмæст иу адæймаг куы уа, уæддæр. Кинотеатр æмæ культурæйы хæдзар баиу кæныны хъуыды йæ рæстæджы уыди раст хъуыды, æмæ экономикон æгъдауæй ахадгæ. Абон та у – рæдыд.
Абон фарста æвзарынц республикæйы культурæйы министрады. Къубалты Эльбрус йæхæдæг кæсы сæвзæрд уавæрмæ.
Кинойы Фонды бадзырдмæ гæсгæ, кинотеатр хъуамæ куса сæрмагонд фæткмæ гæсгæ. Иу бонмæ 7 сеансы, уый 10 сахатæй куы райдайай, уæд. Кинозал байдзаг кæнын, æмæ Мæскуыйы домæнтæ сæххæст кнын, хъæуы æнцон нæу. Елхоты цæрджытæ сæ ных æрмæст киномæ куы саразой, уæд тыллæгмæ æнхъæлмæ дæр ма кæс… хъазгæйæ зæгъы, ансамблы разамонæг.Фарст алыг кæнынæн ссардтой гæнæн. Кинозал ахæсдзысты культурæйы хæдзары 2-аг уæладзыгмæ.Уый фадат ратдзæн сфæлдыстадон къордтæн сценæ суæгъд кæнынæн. Ног залы экран сæвæрдзысты æппæт нырыккон домæнтæ хынцгæйæ. Ног аз кинотеатр скусдзæн ног фæткмæ гæсгæ. Афтæмæй хъæуккаг цардмæ уыдзæни хæстæгдæр. Залы рацарæзт та райдайдзæн хæстæгдæр рæстæг.
