Программæмæ гæсгæ, Кæсæг-Балхъары Республикæйы фæстæ, уыд Цæгат Ирыстоны. Президенты æххæстбарджын минæвар Цæгат Кавказы Федералон зылды Юрий Чайкæ æмæ Цæгат Ирыстоны Сæргълæууæг Сергей Меняйлоимæ Владимир Путин ссардта, террористты къухæй чи фæмард, уыцы адæмы рухс нæмттæ. Владимир Путин бацыд «Зæдты Горæты» мемориалон комплексмæ. Уым ныгæд сты, 2004-æм азы теракты амæттæгтæ. Дарддæр президент дидинджытæ сæвæрта «Хъыджы Бæласыл», стæй сæрмагонд дæлхайæдтæ «Альфæ» æмæ «Вымпелы» æдзард службæгæнджыты цыртдзæвæныл. Владимир Путин бабæрæг кодта Беслæны фыццæгæм скъолайы бæстыхай дæр.
Уымæй дарддæр нæ бæстæйы разамонæгæн равдыстой сывæллæтты курдиæтты райрæзты Центр «Альтаир». Байгом æй кодтой 2022-æм азы Беслæны. Уым кусынц алыхуызон къордтæ, инженерон техникон, наукон æмæ аивадон къабæзты. Нæ бæстæйы Президент ма федта Беслæны сывæллæтты уæлæмхасæн ахуырады центртæ – æрыгон техникты æмæ æрыгон натуралистты станцæтæ. Æрыгон техниктæн сарæзтой сæрмагонд фæзуат. Уым сæ бон у, радиоразамындæй чи кусы, ахæм аппараттæ фæлтæрын.
Фæстæдæр Владимир Путин æмæ Сергей Меняйло фембæлдысты Беслæны мадæлты комитеты уæнгтимæ. Æрдзырдтой сæ риссагдæр фарстатыл. Уый фæстæ Президентæн кусæг фембæлд уыд республикæйы Сæргълæууæгимæ. Бабар ын кодта Беслæны теракты фæдыл уголовон хъуыддагмæ бæстон цæстдарын. Аныхас ма кодтой цардархайды ахсджиагдæр фарстатыл.
